Լեռնային Ղարաբաղի հիմնախնդրի կարգավորման գործընթացում տարածաշրջանային շահերի ու ապակառուցողական նկրատումների փոխարեն պետք է տեղ ունենան մարդու իրավունքների ու ազգերի ինքնորոշման սկզբունքները:
Գերմանացի խորհրդարանականը ԼՂ բնակչության ինքնորոշման իրավունքի հանրայնացման ջատագովն է
ՍՏԵՓԱՆԱԿԵՐՏ, 19 մայիսի, ԱՐՑԱԽՊՐԵՍ-ԱՐՄԵՆՊՐԵՍ: Երևանում լրագրողների հետ հանդիպմանը նման տեսակետ արտահայտեց Գերմանիայի Համբուրգ նահանգի խորհրդարանի պատգամավոր Մարդին Դոլցերը: Գերմանիայի Ձախ կուսակցությունը ներկայացնող գործիչը իր երկու կուսակիցների հետ եղել է Արցախում, հանդիպում ունեցել նախագահի, ԱԳ նախարարի հետ, լսել ԼՂՀ դիրքորոշումը: Նրա խոսքով` տպավորված է այն ամենից, ինչ տեսել է Հայաստանի Հանրապետությունում ու Արցախում:
Անդրադառնալով ապրիլի սկզբին ծավալված ռազմական գործողություններին` բանախոսը ցավով շեշտեց, որ Գերմանիայի դաշնակից Էրդողանի կառավարարությունը ապակառուցողական քաղաքականություն է վարում ու աջակցում Ադրբեջանին շատ գործողություններում: «Որպես խաղաղության կուսակցություն` մենք պայքարում ենք խնդիրը խաղաղ ճանապարհով կարգավորելու ուղղությամբ»,-ասաց Մարդին Դոլցերը:
Մեր հարցին ի պատասխան, թե արդյոք իրենց կուսակցությունը հնարավոր է հանդես գա Լեռնային Ղարաբաղի Հանրապետությունը ճանաչելու նախաձեռնությամբ` Դոլցերը նշեց. «Ազգերի ինքնորոշման իրավունքը միջազգային օրենքներով հաստատված է, այլ հարց է, որ Լեռնային Ղարաբաղի հարցում լուսաբանման խնդիրներ կան, մարդիկ չգիտեն` այն որտեղ է, ինչ է: Մենք մեր առջև խնդիր ենք դրել, որ ինչ տեսել ենք, ներկայացնենք մեր հասարակությանը: Մենք այստեղ Ձախերի կուսակցությունից երեք հոգով ենք, սակայն այն մեծ կուսակցություն է, ու մենք աշխատանք ունենք անելու հենց մեր կուսակցության ներսում, տեղական կազմակերպություններում: Մենք աջակիցներ գրավելու խնդիր ունենք, հարցն այնքան տարածելու, որ կարծիք ձևավորվի: Սա գործընթաց է, որը մենք ցանկանում ենք առաջ տանել»: