Գերմանացի քաղաքական գործիչ, Եվրախորհրդարանի պատգամավոր Բրջիթ Սիփելը կարծում է, որ Հայոց ցեղասպանության ճանաչմամբ Գերմանիան նպատակ չի ունեցել վատթարացնել Թուրքիայի հետ ունեցած հարաբերությունները:
Գերմանացի պատգամավորի համոզմամբ՝ Թուրքիան վտանգում է համագործակցությունը եվրոպական երկրների հետ
ՍՏԵՓԱՆԱԿԵՐՏ, 30 հունիսի, ԱՐՑԱԽՊՐԵՍ-ԱՐՄԵՆՊՐԵՍ: «Մենք այժմ խոսում ենք այն մասին, ինչը պատահել է անցյալում, եւ մենք դա անում ենք՝ ասելու, որ Թուրքիան պետք է ճանաչի այն. միայն այդ դեպքում հնարավոր կլինի սկսել բարեկամական համագործակցություն: Հենց այդպես Գերմանիան արեց Նամիբիայի հետ: Մենք այն անվանեցինք ցեղասպանություն եւ սկսեցինք ձեւավորել նոր հարաբերություններ, ստեղծեցինք նոր ընկերական կապեր: Հայոց ցեղասպանության ճանաչումը ամենեւին չի նշանակում, որ մենք այս քայլով դադարեցնում ենք Թուրքիայի հետ դիվանագիտական կամ տնտեսական համագործակցությունը, պարզապես իրերը պետք է կոչել իրենց անուններով, հնարավորություն տալ զղջալ անցյալում կատարված դեպքերի համար»,- «Արմենպրես»-ի հետ զրույցում նշեց պատգամավորը:
Անդրադառնալով Գերմանիայի Բունդեսթագի` Հայոց ցեղասպանությունը ճանաչող որոշմանը Ադրբեջանի եւ Թուրքիայի արձագանքին, որն ընդհուպ ստիպեց Գերմանիայի թուրք պատգամավորներից մեկին հանդես գալ Էրդողանի մուտքը երկրի տարածք արգելելու կոչով, Բրջիթ Սիփելը նշեց, որ այսպես Էրդողանը պարզապես ի ցույց է դնում իր ցածր դիրքը:
«Ես չեմ հասկանում՝ ինչու է նա այդպես անում, այդպես վարվում պատգամավորների հետ, որովհետեւ ոչ ոք երբեք Էրդողանին չի մեղադրել այդ դեպքերի համար, մենք մեղադրում ենք պատմությունը եւ ուզում ենք դա այդպես անվանել: Եթե Էրդողանը ցանկանում է լավ հարաբերութուններ ունենալ Գերմանիայի եւ այլ երկրների հետ, նա պետք է դադարեցնի այդպես անել: Իսկ եթե շարունակի, ապա կվտանգի համագործակցությունը նաեւ այլ եվրոպական երկրների հետ»,-ասաց նա:
Հունիսի 2-ին Գերմանիայի Բունդեսթագն ընդունեց «1915 թ. հայերի և մյուս քրիստոնյա փոքրամասնությունների ցեղասպանության հիշատակի և ոգեկոչման մասին» անվանումը կրող Հայոց ցեղասպանության ճանաչման բանաձևը, ինչից հետո
Թուրքիան առաջին քայլով հետ կանչեց Գերմանիայում Թուրքիայի արտակարգ եւ լիազոր դեսպանին, ապա մեղադրանքներ հնչեցրեց Բունդեսթագի թուրքական արմատներ ունեցող պատգամավորների նկատմամբ, ինչը բողոքի լայն ալիք բարձրացրեց Բունդեսթագի ներսում ընդդեմ Թուրքիայի, ընդհուպ մինչեւ Բունդեսթագի նախագահ Նորբերթ Լամերթի՝ Էրդողանին ուղղված հայտարարությունը. «Առանձին պատգամավորների վրա սպառնալիքների միջոցով ճնշում գործադրել նշանակում է հարձակվել ողջ խորհրդարանի վրա»:
