Ակնհայտ է, որ ԼՂ հիմնախնդրի կարգավորման այս փուլում նախաձեռնությունը Ռուսաստանինն է, Ղարաբաղի հարցը ակտուալացնողը հիմա Ռուսաստանն է․
ԼՂ խնդրի կարգավորման հարցում զիջումների գնալը սխալ է. Ստեփան Գրիգորյան
ՍՏԵՓԱՆԱԿԵՐՏ, 10 օգոստոսի, ԱՐՑԱԽՊՐԵՍ: Tert.am-ի հետ զրույցում խոսելով ԼՂ հիմնախնդրի կարգավորման ներկայիս փուլի մասին՝ ասաց «Գլոբալիզացիայի և տարածաշրջանային համագործակցության վերլուծական կենտրոնի» խորհրդի նախագահ Ստեփան Գրիգորյանը:
«Դա կապված է նրա հետ, որ Ռուսաստանն ուզում է, որ Ադրբեջանը դառնա Եվրասիական տնտեսական միության անդամ, ուզում է ամեն ինչ անել, որ Ադրբեջանն իր կողմը թեքվի: Ադրբեջանն էլ Ռուսաստանի առաջ խնդիր է դնում, որ Հայաստանը ԼՂ հարցում պետք է զիջումների գնա»,- ասաց Ստեփան Գրիգորյանը:
Քաղաքագետը նկատեց, որ հիմա ԼՂ հիմնախնդրի կարգավորումը թեժ փուլի է անցել: «Ադրբեջանցիք ապրիլին սկսեցին քառօրյա պատերազմ, խաղաղ քաղաքացիների սպանեցին, խոշտանգեցին: Անտեղի եմ համարում այս համատեքստում խոսել փոխզիջումների կամ զիջումների մասին, այս անվստահության մթնոլորտում ոչ մի զիջման կամ փոխզիջման մասին չի կարելի խոսել»,- ասաց նա՝ նշելով, որ հիմա Ռուսաստանի կողմից փորձ է արվում օտարել Հայաստանի պատմական հողերը:
Ստեփան Գրիգորյանը նկատեց, որ վերջին շրջանում «փոխզիջում» բառը շատ է շրջանառվում, բայց պետք է պարզաբանվի՝ ինչ փոխզիջման մասին է խոսքը: «Մեզնից ուզում են տարածքներ, հետո պետք է Արցախում հանրաքվե անցկացվի: Հարց եմ հնչեցնում՝ եթե նրանք տարածքներ վերցնեն, հայերը կկարողանա՞ն հանրաքվեն անցկացնել: Պետք չէ խաբվել այդպիսի խոսքերով»,- ասաց քաղաքագետը:
Նա առաջարկեց հիմնախնդրի լուծման իր տեսլականը՝ նախ Արցախում անցկացվի հանրաքվեն, Ադրբեջանը ճանաչի այդ հանրաքվեի արդյունքները, հետո խոսենք տարածքների մասին․ «Ինչո՞ւ այդ ձևով հիմնախնդիրը չեն քննարկում»,- հարցրեց Ստեփան Գրիգորյանը:
Դիտարկմանը, թե ՌԴ նախագահը հայտարարել է, թե ԼՂ հիմնախնդրի կարգավորման գործընթացում Հայաստանը և Ադրբեջանը պետք է իրենց վրա վերցնեն հակամարտության լուծման պատասխանատվությունը և արդյունքում չպետք է լինեն հաղթողներ ու պարտվողներ, Ստեփան Գրիգորյանն ասաց․ «Դա Պուտինի կողմից Հայաստանի հասարակությանն ապակողմնորոշելու քայլ է: Սա լսելով՝ շատերը կասեն, թե տեսեք, մեզ չեն պարտադրում: Պուտինն ունի շատ լավ խորհրդականներ, որոնք ուսումնասիրում են Հայաստանում եղած տրամադրությունները, գիտեն, որ այստեղ իրենց դեմ քարոզարշավ է գնում, իրենց քաղաքականությունը քննադատվում է: Ասում են՝ արի, քո քաղաքականությունը մեղմացրու, այլ խոսքեր օգտագործի»:
Ըստ այդմ, Ստեփան Գրիգորյանը կարևոր է համարում ոչ թե այն, թե ինչ է ասում Վլադիմիր Պուտինը, այլ թե ինչ է անելու Սերժ Սարգսյանը․«Ես պնդում եմ, որ խոսելու են տարածքների մասին, խոսք կգնա միակողմանի զիջումների մասին: Կարծում եմ, որ մեր իշխանությունները միակողմանի զիջումների չեն գնա՝ հաշվի առնելով հասարակությունում հնարավոր հակազդեցությունները: Ես՝ որպես քաղաքագետ, պարտավոր եմ ասել, զգուշացնել իշխանություններին, որ զիջումների գնալը ոչ միայն սխալ քայլ է, այլ ժողովրդի կամքի դեմ հանցագործություն»:
