Այսօր Արցախի Ազգային ժողովի նիստերի դահլիճում մեկնարկել է «ԼՂՀ 25-ամյա պետականության ձեռքբերումներն ու արդի մարտահրավերները» խորագիրը կրող միջազգային երիտասարդական գիտաժողովը:
Արցախում մեկնարկել է միջազգային երիտասարդական գիտաժողովը
ՍՏԵՓԱՆԱԿԵՐՏ, 16 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` գիտաժողվի բացման խոսքում, ողջունելով ներկաներին ԼՂՀ նախագահ Բակո Սահակյանը կազմակերպված գիտաժողովը համարել է լավ հնարավորություն` Արցախյան հիմնախնդիրն ավելի լայն ու խորն ուսումնասիրելու և այն աշխարհին ներկայացնելու համար:
«Գիտական քննարկումները՝ կապված մեր անկախ պետության կազմավորման պատմության և իրավական հիմքերի անթերիության, նրա անվտանգության, ներքին և արտաքին քաղաքականության, ինչպես նաև այն բարդ ու դժվարին հարցերը, որոնք մեր ժողովուրդն ստիպված է եղել լուծել այս բոլոր տարիների ընթացքում պետք է լինեն ինչպես մեր հանրապետության ստեղծման պատճառների, այնպես էլ նրա կենսագործունեության գիտական ընկալման հիմքում»,- ընդգծել է երկրի Ղեկավարը:
Գիտաժողովին ԼՂՀ Ազգային ժողովի նախագահ Աշոտ Ղուլյանն էլ իր խոսքում կարևորել է այն փաստը, որ քառորդ դար անկախոթյուն ձեռք բերած Արցախում կրթական մակարդակը միշտ էլ դրված է եղել բարձր մակարդակի վրա է: «Գիտական ու կրթական ներուժի օգտագործումը, կրթական հաստատությունների հետ կապերի ամրապնդումը շարունակում են մնալ առաջնահերթ խնդիրներ: «ԼՂՀ 25-ամյա պետականության ձեռքբերումներն ու արդի մարտահրավերները» խորագրով այս գիտաժողովի անցկացումն Արցախում հենց ասածիս հավաստումն է»,- մասնավորապես նշել է ԼՂՀ ԱԺ նախագահը:
Ա. Ղուլյանն իր խոսքում ընդգծել է, որ ողջունելին նաև այն է, որ գիտաժողովի մասնակիցներն իրենց զեկույցներում անդրադարձել են Արցախյան հակամարտության լուծմանը, ԼՂՀ անկախության հռչակմանը, բանակցության գործընթացին, ապրիլյան դեպքերին և հայ ժողովրդի համար կարևոր համարվող այլ հարցերի:
Բացման խոսքում «Արցախի երիտասարդ գիտնականների և մասնագետների միավորման» հասարակական կազմակերպության և միջոցառման կազմկոմիտեի նախագահ Ավետիք Հարությունյանը, ողջունելով ներկաներին, անդրադարձել է Արցախի անկախության հռչակման 25-րդ տարեդարձի կարևորությանը և գիտաժողովի նպատակներին:
« Միջազգային գիտաժողովը նպատակ ունի մեկ անգամ ևս ցույց տալու, որ Արցախը ոչ թե հակամարտության գոտի է, այլ առաջին հերթին ժողովրդավարական , իրավական ու դինամիկ զարգացող պետություն: Միջազգային գիտաժողովի խնդիրը փորձի փոխանակումն է Արցախի երիտասարդ գիտնականների ու արտասահմանյան առաջատար մասնագետների միջև, միջազգային շփումների հաստատումն ու Լեռնային Ղարաբաղի Հանրապետության իրողությունների և գիտական ներուժի ներկայացումը լայն հասարակությանը»,- ասել է Ա. Հարությունյանը և հավելել, որ գիտաժողովին մասնակցում են հեղինակավոր գիտնականներ և մասնագետներ Գերմանիայի, Ռուսաստանի, Լեհաստանի, Հայաստանի, ինչպես նաև այլ երկրների բուհերի և գիտահետազոտական կենտրոններից:
Գիտաժողովին զեկույցներով հանդես են եկել տարբեր երկրներից Արցախ ժամանած հեղինակավոր գիտնականներ և մասնագետներ: