Մարտունու շրջանի Սոս գյուղում ընթացքի մեջ են դպրոցի և մարզադահլիճի նոր շենքերի կառուցումը. սալապատվում են նաև գյուղամիջյան ճանապարհները:
Սոս գյուղում ավարտին է մոտենում դպրոցական շենքի կառուցումը. համայնքի ղեկավարը պատմել է նոր ծրագրերից
ՍԵՓԱՆԱԿԵՐՏ, 8 հոկտեմբերի, ԱՐՑԱԽՊՐԵՍ։ Այս մասին «Արցախպրես»-ի արտահաստիքային թղթակցի (Աննա Ահարոնյան) հետ զրույցում տեղեկացրել է համայնքի ղեկավար Հունան Գրիգորյանը` ավելացնելով, որ դպրոցի և մարզադահլիճի շենքերի կառուցման աշխատանքները իրականացվում են «Հայաստան» համահայկական հիմնադրամի (Հիմնադրամի ԱՄՆ արևմտյան շրջանի տեղական մարմնի հովանավոր Ջերրի Թրփանջյանի միջոցներով) և ԼՂՀ կառավարության համաֆինանսավորմամբ:
«Գյուղում հիմքից կառուցվում է սպորտդահլիճով կից դպրոցական նոր շենք: Շենքը երկհարկանի է լինելու` ընդարձակ միջանցքներով ու լուսավոր դասասենյակներով: Դպրոցի ուսումնական շենքի տանիքի ծածկը արդեն կառուցվել է. այժմ էլ ներքին հարդարման աշխատանքներ են կատարվում: Մարզադահլիճում հանդերձարաններն ու ադմինիստրատիվ սենյակներն արդեն պատրաստ են, սկսվել են արտաքին ջրամատակարարման ու մոնտաժման աշխատանքները: Կրթօջախը ունենալու է ժամանակակից չափանիշներին համապատասխան ենթակառուցվածքներ»,- ասել է Հ. Գրիգորյանը և հավելել, որ ներհամայնքային Ճանապարհների սալապատումն իրականացվում է համագյուղացի, ռուսաստանաբնակ Արթուր Դադասյանի հովանավորությամբ:
Համայնքի ղեկավարը, խոսելով գյուղի բնակիչների թվից ու զբաղմունքից, ընդգծել է, որ նախորդ տարիների համեմատ գյուղի երիտասարդների արտահոսքը հիմնականում դադարել է:
«Որոշ ընտանիքներ այսօր վերադառնում են հայրենի գյուղ: Զբաղվածության խնդիրը հիմնականում լուծված է: Բնակիչները եկամուտի մեծ մասը ստանում է գյուղատնտեսությունից, հիմնականում` խաղողագործությունից և հացահատիկային բույսերի մշակությունից: Ունենք 127 հա խաղողայգի և 1950 հա վարելահող: Կարծում եմ` հնարավոր է անել ամեն ինչ` ունենալու համար ապագայի առավել լավ հեռանկարներով զարգացած գյուղ»,- գոհունակությամբ հավելել է Հ. Գրիգորյանը: