Freedom House միջազգային իրավապաշտպան կազմակերպությունը Հայաստանը դասել է ազատ համացանց ունեցող երկրների շարքին:
Freedom House-ը Հայաստանը դասել է ազատ համացանց ունեցող երկրների շարքին
ՍՏԵՓԱՆԱԿԵՐՏ, 15 նոյեմբերի, ԱՐՑԱԽՊՐԵՍ: Այդ մասին հետևում է կազմակերպության «Համացանցի ազատությունը - 2016» զեկույցից, հայտնում է Թերթ.ամ-ը:
Հայաստանը հավաքել է 30 միավոր: Համացանցի հասանելիության խոչընդոտը գնահատվել է 25-ից 6 միավոր, բովանդակության սահմանափակումները՝ 35-ից 10 միավոր, օգտատերերի իրավունքների խախտումները՝ 40-ից 14 միավոր: Անցած տարի Հայաստանը հավաքել էր 28 միավոր:
Վրաստանը հավաքել է 25 միավոր՝ նույնպես ընդգրկվելով ազատ համացանց ունեցող երկրների շարքում, Ադրբեջանը՝ 55 միավոր՝ ընդգրկվելով մասամբ ազատ համացանց ունեցող երկրների ցանկում: Ռուսաստանը ստացել է 65 միավոր, իսկ Թուրքիան՝ 61 միավոր: Այս երկրներն ընդգրկվել են ոչ ազատ համացանց ունեցող երկրների ցանկում:
Զեկույցի համաձայն՝ Հայաստանի տարածքում համացանցի տարածումը 58 տոկոս է: Ոչ ազատ է գնահատվել համացանցում մամուլի ազատությունը:
Ինչպես նշվում է զեկույցում՝ ընթացիկ տարում համացանցի ազատությունը հիմնականում պահպանվել է՝ չնայած Հայաստանի ընդհանուր կարգավիճակը որոշակի հետընթաց է գրանցել՝ Երևանում բողոքի ցույցերի ժամանակ ուղիղ եթեր հեռարձակող լրագրողների վրա ոստիկանության հարձակումներից հետո:
Հետազոտությունն անցկացվել է 65 երկրում, այն ընդգրկում է 2015 թվականի հունիսից մինչև 2016 թվականի մայիս ընկած ժամանակահատվածը: Հետազոտության արդյունքների համաձայն՝ համացանցի ազատության հետ կապված ամենավատ վիճակը Չինաստանում է, Սիրիայում և Իրանում:
Ոչ ազատ համացանցով երկրների ցանկում են հայտնվել ևս 17 երկիր, այդ թվում՝ Եգիպտոսը, Բելառուսը, Ղազախստանը, Սուդանը, Ռուսաստանը, Պակիստանը և Վիետնամը: Այդ երկրներում, կազմակերպության տվյալներով, հիմնականում գրաքննության է ենթարկվում տեղի իշխանություններին ուղղված քննադատությունը, իսկ սոցիալական ցանցերում հրապարակումների կամ «լայքերի» (հավանությունների) համար կարող է սպառնալ ազատազրկում: Ընդհանուր առմամբ, ոչ ազատ համացանցով երկրներում ապրում է համացանցի օգտատերերի 67 տոկոսը: Անցած տարի այդ ցուցանիշը կազմել է 61 տոկոս:
Իրավապաշտպանների կարծիքով ՝ աշխարհի 28 երկրներում համացանցը մասամբ ազատ է, ևս 17-ում գրաքննությունը գրեթե բացակայում է:
Համացանցի ազատության առաջատար հնգյակում են հայտնվել Էստոնիան, Իսլանդիան, Կանադան, ԱՄՆ-ն և Գերմանիան: Այս ցանկում են հայտնվել նաև Վրաստանը և Հայաստանը:
