Ռուսաստանը, Չինաստանը, ինչպես նաև Վենեսուելան ՄԱԿ-ի Անվտանգության խորհրդում (ԱԽ) արգելափակել են սիրիական Հալեպ քաղաքում մարդասիրական իրավիճակի բարելավման նպատակով 7-օրյա հրադադարի ռեժիմի սահմանման մասին բանաձևի նախագիծը:
Ռուսաստանն ու Չինաստանը ՄԱԿ-ի ԱԽ-ում արգելափակել են Հալեպում 7-օրյա հրադադար սահմանելու մասին բանաձևը
ՍՏԵՓԱՆԱԿԵՐՏ, դեկտեմբերի 6, ԱՐՑԱԽՊՐԵՍ: Ինչպես նշում է Reuters-ը, քվեարկությունը կայացել է դեկտեմբերի 5-ին՝ Նյու Յորքում: Աղբյուրը մանրամասնում է, որ Նոր Զելանդիայի, Իսպանիայի և Եգիպտոսի հեղինակած փաստաթղթի ընդունման օգտին է քվեարկել ՄԱԿ-ի ԱԽ-ի 11 անդամ:
ՄԱԿ-ում ՌԴ մշտական ներկայացուցիչ Վիտալի Չուրկինը քննադատել է բանաձևը՝ պատճառաբանելով, որ հրադադարի սահմանումը թույլ կտա գրոհայիններին վերախմբավորվել: Պաշտոնյան նաև հավելել է, որ քվեարկությունը պետք է հետաձգել մինչև ռուս և ամերիկացի փորձագետների հանդիպումը:
Մինչդեռ gazeta.ru-ն, հավելում է, որ Միացյալ Նահանգների պետդեպարտամենտը քննադատել է Հալեպում ռուսական շարժական հոսպիտալի դեմ իրականացված հարձակումը: Մասնավորապես՝ Պետդեպի պաշտոնական ներկայացուցիչ Մարկ Թոները հայտարարել է, որ «Վաշինգտոնը, անկասկած, քննադատում է ցանկացած տեսակի հարձակում հոսպիտալների ու բժշկական օբյեկտների նկատմամբ՝ անկախ նրանից, թե ով է դրանք իրականացնում»:
Աղբյուրը հիշեցնում է, որ Հալեպի շարժական ռազմական հիվանդանոցի ընդունարանում ընկած ականի պատճառով զոհվել է 2 ռուս կին բուժաշխատող:
Ինչպես ավելի վաղ հայտնել էր Tert.am-ը, ՌԴ ՊՆ-ն միջազգային կազմակերպություններից պահանջել է դատապարտել «Հալեպի խաղաղ բնակչությանն օգնություն ցուցաբերող ռուս բուժաշխատողների դիտավորյալ/կանխամտածված սպանությունը», և խոստացել, որ «այսպես կոչված՝ ընդդիմության գրոհայինների տվյալ հանցագործությունը կհետաքննվի»:
