Ֆուտբոլի Հայաստանի ազգային հավաքականի և անգլիական «Մանչեսթեր Յունայթեդ»-ի կիսապաշտպան Հենրիխ Մխիթարյանին արցախցիները վերջին տարիների լավագույն հայ մարզիկ են համարում:
Արցախում Մխիթարյանը լավագույն մարզիկ է համարվում. հարցախույզ
ՍՏԵՓԱՆԱԿԵՐՏ, դեկտեմբերի 28, ԱՐՑԱԽՊՐԵՍ: Ստեփանակերտի փողոցներում «Արցախպրես»-ի անցկացրած հարցախույզի համաձայն՝ թեև հայկական ֆուտբոլը վերջին երկու առաջնություններում մեծ հաջողություններ չի գրանցել, սակայն հայկական սպորտը արտասահմանում լավագույնս ներկայացնում է հենց Հենրիխ Մխիթարյանը:
«Ֆուտբոլն աշխարհի ամենատարածված ու ամենասիրված սպորտն է, ու աշխարհի առաջատար ակումբներում բարձրակարգ ֆուտբոլիստ լինելը նշանակում է, որ քո երկիրը բազմամիլիոնանոց հանդիսատեսի առաջ ներկայացնում ես քո ամեն մի խաղի ժամանակ»,- ասաց Էրիկ Լալայանը: Մեր զրուցակցի խոսքով՝ օլիմպիական ոսկի շահելը մեծ կարևորություն ունի ցանկացած երկրի համար, բայց պետք չէ մոռանալ նաև Մխիթարյանի ներդրումը Հայաստանի և առհասարակ համաշխարհային ֆուտբոլի զարգացման գործում:
Մխիթարյանի՝ որպես լավագույն մարզիկի, առավելության մասին իր համոզմունքը հայտնեց նաև Հայկ Ավանեսյանը, ով իր խոսքում նշեց, որ ճիշտ կլիներ Հայաստանի 10 լավագույն մարզիկների կազմում այս տարի նա իր արժանի տեղը ունենար: Նրա խոսքով՝ Մխիթարյանի տեղափոխությունը այնպիսի գրանդ ակումբ, ինչպիսին «Մանչեսթեր Յունայթեդն» է, անակնկալ չէր, որովհետև Հենրիխը «Բորուսիայում» անց էր կացրել գերֆանտաստիկ մրցաշրջան:
«Երբ տրանսֆերը կայացավ, ուրախություններս շատ մեծ էր. չէ որ նա առաջին հայ ֆուտբոլիստն է Պրեմիեր Լիգայում: Շատ հավանական է նաև, որ նա կդառնա առաջին հայ ֆուտբոլիստը, ով կհաղթի Պրեմիեր լիգան, ինչու չէ` նաև Չեմպիոնների Լիգան: Վնասվածքից հետո նա խփեց իր կարիերայի ամենագեղեցիկ գոլերից մեկը` «սկորպիոն» հարվածով: Մենք ընկերներով միշտ հավաքվում ու հետևում ենք նրա գեղեցիկ խաղին: Նա մեր պարծանքն է, ու չենք կարող մտածել, որ Հայաստանում ինչ որ մարզիկ կարող է ավելի լավը լինել, քան նա»,- ավելացրեց Հ. Ավանեսյանը:
Հայկի կարծիքին է նաև մեր հարցախույզի մեկ այլ մասնակից՝ Սվետլանա Մեհրաբյանը, ում խոսքով, Մխիթարյանը կարողացել է անգլիական ֆուտբոլի էլիտային ներկայացնել հայ ֆուտբոլիստի իր տեսակը` նույնիսկ նրա պատվին «Մանչեսթեր Յունայթեդի» տրիբունաներում հաճախ ծածանվում է Հայաստանի Հանրապետության դրոշը:
Վիտալի Մարգարյանի կարծիքով էլ, կոչումներն ու պարգևները շատ կարևոր են, բայց եթե ժողովուրդը դժգոհ է ընդհանուր մոտեցումից, ուրեմն պետք է փոխել կարգը:
«Անկասկած, Մխիթարյանը լավագույններից է, ժամանակակից հայկական սպորտի ամենաճանաչված դեմքերից մեկը, եթե ոչ առաջինը: Ոչ մի արդարացում չկա, որ նա տարվա լավագույն մարզիկների թվում չէ: Ինձ ու շատերի համար, համոզված եմ, նա առաջինն է, բայց չի կարելի հասարակության մեջ անիմաստ դժգոհություններ առաջացնել, չէ՞ որ բոլորն էլ մերն են, բոլորին էլ սիրում ենք և ուրախանում նրանց հաջողություններով»,- ասաց մեր զրուցակիցը:
Արամայիս Առստամյանի խոսքով էլ Արթուր Ալեքսանյանի նվաճած օլիմպիական ոսկու փայլը չի մարի երբեք, բայց Մխիթարյանի բարձրակարգ խաղը ամեն անգամ հիացնում է բոլորին: «Նա Հայաստանի լավագույն մարզիկներից է, նրա խփած գոլերն ու գոլային փոխանցումները ավելի շատ բան է տալիս հայ ժողովրդին, քան կարելի է պատկերացնել: Նա Հայաստանի անունն իրոք ճանաչելի է դարձնում ողջ աշխարհում»,- ասաց Արամայիսը:
Իսկ եղբայրներ Տիգրանը, Հայկն ու Արան, խոսելով Մխիթարյանի մասին, ընդգծեցին. «Հենրիխ Մխիթարյանը ազգային արժանապատվություն ունեցող մարզիկ է: Իր խաղով նա նպաստում է Հայաստանում և Արցախում ֆուտբոլի տարածման ու մասայականացման գործին: Նրա խաղը միայն ֆուտբոլ չէ. այն արվեստ է: Կարծում ենք` շատ ընտանիքներում նրա խաղը դիտելը համարում են յուրօրինակ տոնակատարություն` համոզված լինելով, որ Մխիթարյանը իր գեղեցիկ խաղով նորանոր երջանիկ ակնթարթներ է պարգևելու իր` բազմահազար հայ և օտարազգի երկրպագուներին»: