Գերմանիայի կանցլեր Անգելա Մերկելը Թուրքիայի ղեկավարության հետ հանգամանորեն քննարկել է Ստամբուլում ձերբակալված գերմանական Die Welt պարբերականի թղթակից Դենիզա Յուջելի հարցը:
Մերկելը քննադատել է Թուրքիայի գործողությունները
ՍՏԵՓԱՆԱԿԵՐՏ, մարտի 1, ԱՐՑԱԽՊՐԵՍ։ Այս մասին, հայտնում է «Ռիա Նովոստի»-ն:
Ներկայումս Ստամբուլի դատախազությունը քննում է ձերբակալված լրագրողին:
Գերմանիայի կանցլեր Անգելա Մերկելը Թուրքիայի իշխանություններին քննադատել է լրագրողի նկատմամբ անհամարժեք պատիժ սահմանելու համար և կոչ արել հարգել խոսքի ազատության իրավունքը, ազատ արձակել լրագրողին:
«Ինչպես կանցլեր Մերկելը, այնպես էլ Գերմանիայի ողջ կառավարությունը սպասում է, որ լրագրողը որքան հնարավոր է արագ ազատ արձակվի: Դենիզ Յուջելը պետք է իմանա, որ մենք սատարում ենք իրեն և հաջորդ շաբաթից սկսած մենք նրան պաշտպանելու համար գործի ենք դնելու բոլոր դիվանագիտական լծակները:
Մենք պնդում ենք որ մեր հյուպատոսական անձնակազմին թույլ տան տրամադրել նրան համապարփակ օգնություն»,- լրագրողների հետ ճեպազրույցի ժամանակ ասել է Գերմանիայի Դաշնային Հանրապետության կառավարության խոսնակ Շտեֆֆեն Զայբերտը:
Յուջելի ձերբակալման առնչությամբ Բեռլինում Թուրքիայի դեսպան Ալի Քեմալ Այդընը փետրվարի 28-ին կանչվել է Գերմանիայի արտաքին գործերի նախարարություն: Այստեղ նրան հայտնել են, որ Յուջելի կալանավորումն անընդունելի է և անհամաչափ: Բացի այդ, նշվել է, որ լրագրողի ձերբակալությամբ թուրք-գերմանական հարաբերություններն ավելի բարդ շրջան են թևակոխում:
Դենիզ Յուջելը մեղադրվում է ահաբեկչական կազմակերպությանը հարելու, տվյալների ոչ ճիշտ օգտագործման, ինչպես նաև ահաբեկչություն քարոզելու մեջ: Պատճառը Թուրքիայի էներգետիկայի և բնական պաշարների նախարար Բերաթ Ալբայրաքի էլեկտրոնային փոստի նկատմամբ իրականացված հաքերային հարձակումների թեման լուսաբանելն է:
