Արցախի ֆրանսախոս երիտասարդների ակումբը հիմնադրվել է 1997 թվականին:
Ստեփանակերտում գործող ֆրանսախոսների ակումբն ակտիվ գործունեություն է իրականացնում
ՍՏԵՓԱՆԱԿԵՐՏ, մարտի 7, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Ստեփանակերտի ֆրանսախոսների ակումբի ղեկավար Գոհար Հարությունյանը և նշել, որ ակումբի առաջնային նպատակն է ֆրանսերենն Արցախում տարածելը և արցախցիներին ֆրանսիական մշակույթի հետ ծանոթացնելը: 
«Արցախի մի խումբ երիտասարդներ ակտիվորեն մասնակցում են ակումբի գործունեությանը: Այսօրվա դրությամբ ակումբն ունի 25 անդամ: Ամենաառաջին և հիմնական ծրագիրը եղել է ֆրանսերեն լեզվի դասավանդումն այն երիտասարդներին, ովքեր ցանկություն ունեն սովորել այդ գեղեցիկ լեզուն: Ֆրանսիական բարեգործական կազմակերպության շնորհիվ ակումբում ստեղծվել է ֆրանսիական գրադարան և տեսադարան»,-ասել է Գ. Հարությունյանը և ավելացրել, որ 1997 թվականից ի վեր «Ֆրանսիայի բողոքական եկեղեցու և Հայաստանի միջև համերաշխություն» (SPFA) բարեգործական կազմակերպության միջոցով Արցախ են այցելում ֆրանսիացի զբոսաշրջիկներ, և ակումբի ֆրանսախոս երիտասարդներին հնարավորություն է ընձեռվում անմիջական շփում ունենալ նրանց հետ, ինչն էլ ավելի է նպաստում լեզվի տիրապետմանը:
Գ. Հարությունյանի խոսքով՝ բացի ֆրանսերենի դասերից, ակումբը մինչ օրս Արցախում իրականացրել է մի շարք ծրագրեր, այդ թվում և էկոլոգիական, կրթական, մշակութային:
«Ակումբը հաճախակի է հյուրընկալում արտերկրից ժամանած ֆրանսիացի դասախոսների և այլ օտարերկրյա հյուրերի. մեր կողմից նրանց ներկայացվում են ակումբի գործունեությունն ու նպատակները: Ֆրանսիացի դասախոսների շնորհիվ ակումբում կազմակերպվում են սեմինարներ, ֆիլմի դիտումներ, տարբեր թեմաներով բանավեճեր և ֆրանսերենի դասընթացներ: Ֆրանսախոս երիտասարդների ակումբի անդամների շնորհիվ ամեն տարի իրականացվում է «Ֆրանսախոսության օրերն Արցախում» միջոցառումը, որի ընթացքում կազմակերպվում են ֆրանսիական ֆիլմերի դիտում, երգերի կատարումներ, ֆրանսերենով ներկայացումների բեմադրում,-ավելացրել է ակումբի ղեկավարը և ընդգծել,-ի դեպ, տարին երկու անգամ ակումբի անդամները հնարավորություն ունենում Ֆրանսիայից ժամանած զբոսաշրջիկների հետ մասնակցել Հայաստանում SPFA-ի կողմից կազմակերպված շրջագայություններին»:
Գ. Հարությունյանը տեղեկացրել է նաև, որ Ստեփանակերտի ակումբի անդամները Հայաստանի տարբեր մարզերում գործող SPFA կազմակերպության ֆրանսախոս երիտասարդների ու ֆրանսիացի երիտասարդների հետ համատեղ մասնակցում են «Ամառային համալսարան» ծրագրին
«Շնորհիվ այդ ծրագրի երիտասարդները երկուստեք հնարավորություն են ունենում բացահայտել միմյանց մշակույթը, քաղաքակրթությունը, առօրյան, սովորույթները և այլն»,-հավելել է ակումբի ղեկավարը և ընդգծել, որ 2004 թվականից SPFA կազմակերպությունն իրականացնում է նաև «Կարդալու բերկրանքը» ծրագիրը, որի շրջանակներում երեխաները կարողանում են օգտվել ֆրանսիական մանկական գրքերից. 2-12 տարեկան բոլոր երեխաները շաբաթը 2 անգամ կարող են անվճար հաճախել կենտրոն և մասնակցել ծրագրին:
