Մարտի 12-ին Աբխազիայի Հանրապետությունում տեղի ունեցած խորհրդարանական ընտրություններին դիտորդական առաքելություն իրականացրած արցախյան պատվիրակության ներկայացուցիչ, Ազգային ժողովի պատգամավոր Արսեն Առստամյանը պատմել է իր տպավորությունների մասին:
Ինչ տպավորություններով է Աբխազիայից վերադարձել արցախյան պատվիրակությունը. զրույց ԱԺ պատգամավորի հետ
ՍՏԵՓԱՆԱԿԵՐՏ, մարտի 16, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ ԱԺ պետաիրավական հարցերի մշտական հանձնաժողովի նախագահի տեղակալը նշել է, որ մարտի 11-ին Սուխումում արցախյան պատվիրակությանը ընդունել է Աբխազիայի Հանրապետության նախագահ Ռաուլ Խաջիմբան:
«Մարտի 12-ին մենք իրականացրել ենք դիտորդական առաքելություն 10 ընտրական տեղամասերում: Ընտրություններն անց են կացվել Աբխազիայի ընտրական օրենսգրքի և ժողովրդավարական սկզբունքներին համապատասխան: Մեր դիտորդական խումբը խախտումներ չի արձանագրել: Քվեարկությունն անց է կացվել հանգիստ, արտառոց որևէ բանի ականատես չենք եղել: Որոշակի թերություններ, իհարկե, կային, բայց դրանք, ըստ էության, չէին կարող որևէ ազդեցություն ունենալ ընդհանուր արդյունքների վրա»,- ասել է Ա. Առստամյանը:
Անդրադառնալով Արցախում տեղի ունեցող նմանատիպ գործընթացների նմանությանն ու տարբերությանը՝ Ա. Առստամյանը նշել է, որ Աբխազիայում պատգամավորները ընտրվում են միայն մեծամասնական ընտրակարգով: «Իհարկե, երկրում կան կուսակցություններ, բայց կուսակցաշինության ոլորտում դեռևս շատ անելիքներ կան: Համամասնական ընտրակարգ գոյություն չունի: Երկու ընտրատարածքում համոզիչ հաղթանակներ են տարել մեր հայրենակիցներ՝ Աշոտ Մինոսյանը և Լևոն Գալստյանը: Եվս երկու ընտրատարածքներում հնարավոր է հաղթեն մեր հայրենակիցները, քանի որ երկրորդ փուլ է անցկացվելու: Մեկում միանշանակ է, որ հայ թեկնածու կընտրվի, որովհետև իրար հետ պայքարում են Աբխազիայի հայ համայնքի ղեկավար Գալուստ Տրապիզոնյանն ու կրկին հայ թեկնածու Լևոն Դաշյանը, իսկ 4-րդում՝ այլազգի թեկնածուի հետ պայքարում է մեր հայրենակից Էրիկ Ռշտունին: Այնպես որ հնարավորություն կա խորհրդարանում ունենանք 4 հայ պատգամավոր, նախկին խորհրդարանում ունեցած 3 մանդատի փոխարեն»,- մանրամասնել է ԱԺ պատգամավորը և հավելել, որ հայերը կազմում են Աբխազիայի բնակչության ավելի քան 17 տոկոսը:
Արսեն Առստամյանը նաև նշել է, որ երկու երկրների միջև համագործակցության լայն հնարավորություններ կան: «Ես կարծում եմ, որ նորընտիր խորհրդարանի ձևավորվելուց հետո բավականին լուրջ գործնական քայլեր կարվեն միջխորհրդարանական կապերի ամրապնդման գործում: Այդ ուղղությամբ դեռևս աշխատանքներ շատ ունենք անելու: Ընտրված հայ պատգամավոր Լևոն Գալստյանի հետ արդեն նախնական պայմանավորվածություն ենք ձեռք բերել խորհրդարանական դիվանագիտության ակտիվացման ուղղությամբ: Փորձելու ենք օգտագործել ընձեռված հնարավորությունները երկու երկրների միջև կապերի ամրապնդման և զարգացման ուղղությամբ»,- ասել է ԱՀ ԱԺ պատգամավորը:
Նշենք, որ մարտի 12-ին Աբխազիայի Հանրապետությունում տեղի ունեցած խորհրդարանական ընտրություններին դիտորդական առաքելությամբ մասնակցել է նաև Արցախի պատվիրակությունը, որը գլխավորել է ԱՀ ԱԺ պատգամավոր, «Հայրենիք» խմբակցության ղեկավար Արթուր Թովմասյանը: