Այսօր «Արևիկ» մանկական բուժմիավորումում Հայ օգնության ֆոնդի և ԱՀ առողջապահության նախարարության նախաձեռնությամբ կազմակերպվել է «Մանկական հիվանդությունների անհետաձգելի բուժօգնություն» թեմայով դասընթաց:
Երևանից ժամանած բժիշկներն Արցախում ներկայացնում են մանկական ինտենսիվ թերապիայի նոր մոտեցումները
ՍՏԵՓԱՆԱԿԵՐՏ, մարտի 17, ԱՐՑԱԽՊՐԵՍ: Բացման խոսքում Հայ օգնության ֆոնդի (ՀՕՖ) առողջապահական ծրագրերի ղեկավար Համբարձում Սիմոնյանն նշել է, որ իրենք արդեն 10 տարի է, ինչ իրականացնում են բժշկական ծրագրեր, կազմակերպում վերապատրաստման դասընթացներ:
«Արցախպրես»-ի թղթակցի հետ զրույցում Համբարձում Սիմոնյանն ասել է, որ ՀՕՖ-ի և Արցախի համագործակցությունն սկսվել է 2003 թվականից: Համագործակցության շրջա-նակներում կազմակերպվում են վերապատրաստման գործնական դասընթացներ:
«2011 թվականից Ամերի-կայի հայ բժիշկների օգնությամբ ստացել ենք լրացուցիչ հնարավորու-թյուն՝ Արցախից ավելի մեծ թվով բժիշկներ հրավիրելու Երևանի առաջատար կլինիկաներ: 2 տարի անընդմեջ ՀՕՖ-ը համագործակցում է Ամերիկայի «Մանկական ինտենսիվ թերապիայի ասոցիացիայի» հետ և Հայաստանի և Արցախի բժիշկների համար իրականացվում են մի շարք ծրագրեր: Հայաստանից և Արցախից 20 բժիշկ մասնակցել է ասոցիացիայի կողմից կազմակերպված դասընթացներին, որից հետո մասնակիցներս ենք նմանատիպ դասընթացներ անցկացնելու իրավունք ստացել: Այսօր՝ առաջին անգամ, Արցախում մենք այն իրականացնում ենք: Դասընթացի ընտրված թեմաները միանշանակ արդիական են,-ասել է Հ. Սիմոնյանը և ընդգծել,-վերջին 5 տարիների ընթացքում մանկական ինտենսիվ թերապիայի վերաբերյալ նոր մոտեցումներ են ի հայտ եկել: Ի պատիվ մեր առաջատար մասնագետների՝ բավականին բարձրացվել է բժիշկների փորձառությունը. մանավանդ վերջին տարիներին արդեն ակնառու են մանկական և նորածնային մահացությունների նվազման դեպքերը»:
«Սուրբ Աստվածամայր» բժշկական կենտրոնի վերակենդանացման և ինտենսիվ թերապիայի ղեկավար Աննա Չոբանյանն էլ ասել է, որ իրենք տարիներ շարունակ համագործակցում են «Արևիկ» մանկական բուժմիավորման հետ:
«Թեմաների հրատապությունը շատ կարևոր է: Մենք ներկայացրել ենք 6 թեմա, որոնք անհրաժեշտ են տեղի մասնագետների համար: Վաղը մենք նաև ծանր հիվանդների ընդունելություն կկազմակերպենք»,-ասել է Ա. Չոբանյանը:
«Արևիկ» մանկական բուժմիավորման տնօրեն Մեսրոպ Մարգարյանն էլ նշել է, որ դասընթացներին մասնակցում է Ստեփանակերտի և Արցախի շրջաններից շուրջ 50 բժիշկ:
«Ծրագիրը գործնական է. նպատակ ունի օգնել բժիշկներին ցուցաբերելու որոշակի միջամտություններ, վերագնահատելու հիվանդի վիճակը և շարունակելու բուժումը: Այս ծրագիրն ունի միջազգային մշակված ձևաչափ: Ծրագիրն անհրաժեշտ է բոլոր նրանց, ովքեր առաջինն են շփվում ծանր վիճակում գտնվող հիվանդների հետ: Այս դասընթացների առանձնահատկությունն նաև այն է, որ բժիշկները դասընթացների և՛ սկզբում, և վերջում անց են կացնում թեստեր, որոնցից պարզ է դառնում, թե ինչպես է յուրացվել դասընթացը,-ասել է Մ. Մարգարյանը և հավելել,-այսօր դասընթացներին ներկայացվում են մինչ հիվանդանոցային և հիվանդանոցային պայմաններում հիվանդների նկատմամբ բժիշկների նոր մոտեցումների ձևերը»:
