«Halo Trust» բրիտանական կազմակերպությունն Արցախում ականազերծման աշխատանքներ է կատարում 2000 թվականից ի վեր:
Արցախում ականազերծման աշխատանքներին ակտիվ մասնակցում են նաև կանայք. «Halo Trust»ի ղեկավար
ՍՏԵՓԱՆԱԿԵՐՏ, 22 օգոստոսի, ԱՐՑԱԽՊՐԵՍ: «Արցախպրես»-ի հետ զրույցում Արցախում կազմակերպության տարածաշրջանային ղեկավար Աշ Բոդիի խոսքով՝ ամեն տարի ունեցել են ավելի քան 100 աշխատող, սակայն ընթացիկ տարում աշխատողների թիվը հասցվել է 210-ի:
«Halo Trust»-ում աշխատում են նաև կին-սակրավորներ: «Առաջին խումբը ստեղծվել է 2015 թվականին Քաշաթաղի շրջանի Քարեգահ գյուղից: Այժմ կա երեք այդպիսի խումբ, որտեղ կանանց թիվը գերակշռում է, և կփորձեն մինչև մյուս տարվա վերջը նրանց թիվը ավելացնել»,- ասել է Ա. Բոդին:
Այն հարցին, թե ինչ սկզբունքով են աշխատանքի վերցնում կազմակերպությունում, Բոդին նշեց, որ «Halo Trust»-ում աշխատելու համար պետք է անցնել 5 շաբաթյա փորձաշրձան: Առաջին չորս շաբաթվա ընթացքում ծրագրում ընդգրկված է թեորիայի, պրակտիկայի ականազերծման ուսուցում, իսկ հինգերորդ շաբաթը՝ առաջին բուժօգնության: Ամեն փուլից հետո մասնակիցները հանձնում են քննություն, և այդ ընթացքում որոշում աշխատանքը նպատակահարմա՞ր է, թե՝ ոչ:
Կին-սակրավոր 40-ամյա Լիլիկ Մարտիրոսյանը Ստեփանակերտից է: «Halo Trust»-ում սկսել է աշխատել 2017 թվականի ապրիլի երկուսից:
«Աշխատանքը բարդ է և վտանգավոր:Սակայն մենք անում ենք ամեն ինչ, որպեսզի մյուսների համար վերացնենք այդ վտանգը: Մեր խումբը բաղկացած է 7 սակրավորից, որից 5-ը կանայք են, և մեկ հրամանատարից»,- ասաց Լիլիկը և հավելեց, որ աշխատանքի մասին տեղեկացել է ամուսնուց, ով ևս աշխատում է «Halo Trust»-ում` որպես ականազերծող: Լիլիկի խոսքով՝ ամուսիներով միևնույն խմբում են աշխատում և ամեն անգամ ականազերծման գնալուց առաջին հերթին մտածում են, որ պարտավոր են ամեն ինչ անել, որպեսզի անփորձանք վերադառնան, քանի որ տանը սպասում են իրենց անչափահաս զավակները…
