Ոչ ֆորմալ կրթության ծրագրի շրջանակներում այսօր Արցախի պետական համալսարանում տեղի է ունեցել հանդիպում բիզնես փորձագետ, Ayvazyan & Partners բիզնեսի կառավարման ընկերության հիմնադիր Վահե Այվազյանի և թվային մարքետինգի մասնագետ, ֆիզիկոս Մկրտիչ Լազիևի հետ:
ԱրՊՀ-ում տեղի է ունեցել թվային մարքեթինգի և էմոցիոնալ վաճառքների թեմայով դասախոսություններ
ՍՏԵՓԱՆԱԿԵՐՏ, 14 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ բացման խոսքում միջոցառմանը ԱրՊՀ ռեկտոր Մանուշ Մինասյանը կարևորել է ոչ ֆորմալ կրթության ծրագիրը և ավելացրել, որ այն հնարավորություն է տալիս ընդլայնել ուսանողների մտահորիզոնն ու մասնագիտական նոր գիտելիքներ ձեռք բերել:
Խոսելով թվային մարքետինգի հնարավորությունների մասին՝ Մկրտիչ Լազիևը նշել է, որ Հայաստանում գործում են մի շարք ընկերություններ, որոնք իրենց աշխատանքում օգտագործում են թվային մարքետինգը:
Մ. Լազիևը հայկական ընկերությունների փորձի հիման վրա ցույց է տվել այն կարևոր տարրերը, որոնք անհրաժեշտ են բիզնես ոլորտը զարգացնելու համար: Այդ տարրերի մեջ նա կարևորել է վաճառքը, արտադրանքը և հաճախորդներին մշտական դարձնելը:
Իսկ բիզնես փորձագետ, «Ayvazyan & Partners» բիզնեսի կառավարման ընկերության հիմնադիր Վահե Այվայզյանը հանդես է եկել «էմոցիոնալ վաճառքներ» թեմայով դասախոսությամբ: Նա ներկայացրել է, թե ինչ է « էմոցիոնալ վաճառքը», և նշել հիմնական ձևակերպումները:
«Առօրյայում բոլորս ենք էմոցիաներով առաջնորդվելով՝ գնում այս կամ այն ապրանքը, մեր սիրած գույնի, թարմության, կանխակալ վերաբերմունքի, կամ էլ լսելով ապրանքի գովազդի մասին»,- նշել է բանախոսը և ներկայացրել օրինակներ, որոնցում ընդգծվում են մարդու վարքը, ապրումները (հիացմունք, բավականության, հարմարավետության զգացում), երբ նա ձեռք է բերում որևէ ապրանք:
Բիզնես փորձագետն ուսանողներին խորհուրդ է տվել անհատապես ճանաչել հաճախորդին, ծանոթ լինել նրա նախասիրություններին, կերպարին, ինչն էլ հնարավորություն է տալիս իրականացնել էմոցիոնալ վաճառք՝ մեծացնելով վաճառքի ծավալները: Նա նշել է, որ մարդկանց էմոցիաների վրա ազդելու հմտությունը մարքեթինգային ժամանակակից գործիքներից է և ադրադարձել է նաև համացանցում էմոցիոնալ վաճառքներ իրականացնելու առանձնահատկություններին:
