Արցախի երիտասարդ գիտնականների և մասնագետների միավորման (ԱԵԳՄՄ) նախաձեռնությամբ ՀՀ սպորտի և երիտասարդության հարցերի նախարարության և «Զանգեզուրի պղնձամոլիբդենային կոմբինատ» ՓԲԸ-ի աջակցությամբ Արցախի Հանրապետության Ազգային ժողովի նիստերի դահլիճում այսօր մեկնարկել է «Արցախը հանուն խաղաղության, ճանաչում հանուն խաղաղության» կարգախոսով և «Արցախի Հանրապետության միջազգային ճանաչման հիմնախնդիրներն ու հեռանկարները» խորագրով միջազգային երիտասարդական 2-րդ գիտաժողովը:
Ստեփանակերտում մեկնարկել է միջազգային երիտասարդական 2-րդ գիտաժողովը
ՍՏԵՓԱՆԱԿԵՐՏ, 15 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ գիտաժողովին բացման խոսքով հանդես է եկել «Արցախի երիտասարդ գիտնականների և մասնագետների միավորում» ՀԿ հիմնադիր, գիտաժողովի կազմկոմիտեի նախագահ Ավետիք Հարությունյանը, ով ընթերցել է ԱՀ նախագահ Բակո Սահակյանի ուղերձը միջազգային երիտասարդական 2-րդ գիտաժողովի մասնակիցներին. այնտեղ մասնավորապես ասված է.
«Այս նախաձեռնությունը լայն հարթակ է արցախյան հիմնախնդիրը տարբեր տեսանկյուններից դիտարկելու և միջազգային շրջանակներին ներկայացնելու համար: Գիտագործնական առումով գիտաժողովում քննարկվող թեմաներն արդիական են ու կարևոր: Ուրախալի է, որ գիտաժողովի աշխատանքներին մասնակցելու հայտ են ներկայացրել տարբեր երկրների գիտնականներ և վերլուծաբաններ: Ուզում եմ վստահություն հայտնել, որ գիտաժողովն արդյունավետորեն կիրականացնի իր առջև դրված խնդիրները և արժանի ավանդ կունենա Արցախի ու տարբեր երկրների գիտավերլուծական շրջանակների միջև կապերի ամրապնդման գործում»:
Ավետիք Հարությունյանը մեզ հետ զրույցում նշել է, որ գիտաժողովի անցկացման նպատակն է՝ բացահայտել Արցախի Հանրապետության միջազգային ճանաչմանը խոչընդոտող հիմնախնդիրները, առկա հնարավորությունները և հետագա աշխատանքները, ինչպես նաև խթանել երիտասարդ հետազոտողների գիտական հակումները:
«Գիտաժողովի նպատակ ունի օտարազգի գիտնականների ու վերլուծաբանների միջոցով բացահայտել ԱՀ միջազգային ճանաչման հնարավորությունները, հեռանկարները և այլն: Մեր կարևոր ասելիքներից մեկն այն է, որ նրանք իրենց կարծիքները հնչեցնեն հենց Արցախից և այստեղից էլ լսելի դառնա ողջ աշխարհին: Ինչպես նախորդ, այնպես էլ այս միջազգային գիտաժողովի համար Ադրբեջանը հերթական հիստերիան է բարձրացրել, թե ինչո՞ւ է նման գիտաժողով կազմակերպվում Ստեփանակերտում:
Ի հակադրություն նրանց՝ մենք պետք է ամեն տարի հենց Ստեփանակերտում կազմակերպենք նման բնույթի միջոցառումներ. Արցախը դարձնենք արդիական միջազգային հիմնախնդիրների քննարկման հարթակ»,- մասնավորապես ասել է Ա. Հարությունյանը:
Խոսելով գիտաժողովին ներկայացվող նյութերի տարածման, մասնակիցների մասին Ա. Հարությունյանն մանրամասնել է. «Նախորդ տարվա կազմակերպած գիտաժողովի նյութերը հրապարակվել են արտասահմանի, նաև տարբեր սոցիակլական խմբերում և կայքերում: Գիտաժողովին հայտ ներկայացրած մասնակիցներին ավելացել են 2 երկրի ներկայացուցիչներ. նրանք ԱՄՆ-ից են և Ուկրաինայից, սակայն վերջինս չի կարողացել անձամբ մասնակցել. նրա ելույթը գիտաժողովում ընթերցվելու է: Գիտաժողովին մասնակցում է 63 հոգի, նրանք ԱՄՆ-ից, Գերմանիայից, Լեհաստանից, ՌԴ-ից, Հայաստանից և Արցախից»:
Լիագումար նիստի առաջին մասում հանդես են եկել Համբուրգի համալսարանի պրոֆեսոր, իրավագիտության գիտությունների դոկտոր (ի.գ.դ.) Օտտո Լուխտենհանդտը, Նյու Յորքի իրավունքի դպրոցի պրոֆեսոր, ի.գ.դ. Ամիթ Չաբրան, Լեհաստանից` քաղաքագիտության դոկտոր, պրոֆեսոր Մարեկ Ժեյմոն, Արցախի Հանրապետության Նախագահի խորհրդական Տիգրան Աբրահամյանը և քաղաքագետ Հրանտ Մելիք-Շահնազարյանը:
Լիագումար նիստից հետո գիտաժողովի աշխատանքներն շարունակվում են իրավագիտության, քաղաքագիտության, պատմության, տնտեսագիտության, հոգեբանության և բանասիրության բաժանմունքներում:
Տեղեկացնենք, որ սեպտեմբերի 16-ին կամփոփվեն գիտաժողովի արդյունքներն ու կհանձնվեն հավաստագրերը, որից հետո հյուրերը Հադրութի շրջանի Տողի մելիքական ապարանքում կմասնակցեն Արցախյան գինու չորրորդ փառատոնին:
