2017 թվականին, 2015 թվականի համեմատ, միջանձնային հարաբերությունների արդյունքում տեղի ունեցող սպանությունների թիվը նվազել է 2 անգամ:
Բանակում միջանձնային հարաբերությունների արդյունքում տեղի ունեցող սպանությունների թիվը նվազել է 2 անգամ. նախարար
ՍՏԵՓԱՆԱԿԵՐՏ, 24 հունվարի, ԱՐՑԱԽՊՐԵՍ: Այս մասին այսօր՝ հունվարի 24-ին հրավիրած մամուլի ասուլիսի ժամանակ ասել է ԱՀ պաշտպանության նախարար Լևոն Մնացականյանն՝ ընդգծելով, որ հաշվի առնելով 2016 թվականի ապրիլին տեղի ունեցած ռազմական գործողությունները, 2017 թվականին արձանագրված միջադեպերի համեմատականն անց է կացվել 2015 թվականի հետ: Միջադեպերի քանակն աճել է 1-ով, սակայն կորուստների քանակը նվազել 9-ով: 116-ով նվազել են նաև վիրավորման դեպքերը:
«Արցախպրես»-ի այն հարցին, թե միջանձնային հարաբերությունների արդյունքում տեղի ունեցող սպանությունները բացառելու նպատակով ՊԲ-ի կողմից ի՞նչ աշխատանքներ են տարվել 2017 թվականին, Լ. Մնացականյանն ասել է, որ հիմնական աշխատանքի ուղղությունն է, որպեսզի զորակոչվելուց հետո ավելի մանրակրկիտ ուսումնասիրվի տվյալ զինծառայողը, իսկ պաշտոնի նշանակելիս՝ ընտրությունը ճիշտ կատարվի:
«Այդ ուղղությամբ մենք աշխատում ենք: Սակայն պետք է շարունակենք ավելի խիստ պայքարել բանակում առկա արատավոր երևույթների դեմ: Այս գործում փորձում ենք ընդգրկել նաև իրավապահ մարմիններին, մասնավորապես՝ ռազմական ոստիկանությանը և քննչական ծառայությանը»,- նշել է Լ. Մնացականյանը և ավելացրել, որ հիմնականում զինվորների հետ աշխատանքներ տանում են անձնակազմի հետ տարվող աշխատանքների գծով սպայական կազմը, հոգևոր սպասավորները և իրավաբանները:
