Հայ հեղափոխական դաշնակցության Արցախի երիտասարդական և «Արամ Մանուկյան» ուսանողական միությունների նախաձեռնությամբ Ստեփանակերտում կազմակերպվել է ավանդական ջահերով երթ՝ նվիրված Հայոց ցեղասպանության 103-րդ տարելիցին:
Ստեփանակերտում տեղի է ունեցել ավանդական ջահերով երթ (լուսանկարներ)
ՍՏԵՓԱՆԱԿԵՐՏ, ապրիլի 23, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ մինչ երթն սկսելը Ստեփանակերտի Սուրբ Հակոբ եկեղեցում Արցախի թեմի առաջնորդ Պարգև Արքեպիսկոպոս Մարտիրոսյանը Հայոց ցեղասպանության նահատակների հիշատակման կարգ է կատարել:
Այնուհետև երթի մասնակիցները վառած մոմերը ձեռքներին, ոճրագործությունը դատապարտող պաստառներով և «Հայ զինվորը կանխեց նոր ցեղասպանությունը» և այլ կոչ-կարգախոսներ վանկարկելով եկեղեցու բակից Ստեփանակերտի կենտրոնական փողոցով շարժվել են դեպի Հայոց ցեղասպանության զոհերի հիշատակին կառուցված Զանգակատուն-հուշակոթող:
Ճանապարհին ջահերթի մասնակիցները ցուցադրաբար վառել են Թուրքիայի և Ադրբեջանի պետական դրոշները:
Զանգակատուն-հուշակոթողի մոտ երթի մասնակիցների համար ցուցադրվել է Հայոց Ցեղասպանությունը դատապարտող տեսանյութ:
Ելույթով հանդես է եկել ԱՀ ԱԺ պատգամավոր, պատմաբան Լեռնիկ Հովհաննիսյանը՝ ասելով, որ աշխարհի 30 երկրներում, որտեղ որ գործում է Հայ հեղափոխական Դաշնակցության երիտասրադական և պատանեկան միություններ, կազմակերպել են ջահերթ:
Նրա խոսքվ՝ Հայոց Ցեղասպանության պայքարն այսօր մտել է նոր փուլ:
Ըստ Լ. Հովհանիսյանի՝ պետք է պայքարել Ցեղասպանության քրեականացման և հատուցման համար:
Նա հավատացած է, որ այսօրվա հայ երիտասարդությունը՝ անկախության սերունդը, ընդունակ է հայրենասիրական մեծ սխրանքների:
Հայ հեղափոխական դաշնակցության Արցախի երիտասարդական միության վարիչ մարմնի ներկայացուցիչ Մերուժան Սուլեյմանյանն էլ իր խոսքում ասել է, որ ավանդական դարձած այս ջահերթը ոչ միայն սգո, այլ նաև պահանջատիրության երթ է:
Նա նշել է, որ քանի դեռ ցեղասպան Թուրքիան անպատիժ է, և դեռ չի հատուցել, բոլորը պարտավոր ենք պայքարել հանուն արդարության՝ առաջնորդվելով «Հիշում եմ ու պահանջում» կարգախոսով:
ԱՀ մշակույթի, երիտասարդության հարցերի և զբոսաշրջության փոխնախարար Գայանե Գրիգորյանն ասել է, որ սրանից 103 տարի առաջ, Արևմտյան Հայաստանի բոլոր բնակավայրերում, գյուղերում և քաղաքներում, միանգամից սկսվել է հայ ժողովրդի կոտորածը: Երիտթուրքերի հրահանգով ձերբակալվել են հայ ժողովրդի սերուցքը ներկայացնող մտավորականությանը:
Դատապարտելով եղերագործ Թուրքիայի ոճրագործությունը՝ Գ. Գրիգորյանն մասնավորապես ասել է. «Ոչ ասելով աշխարհում տեղի ունեցող բոլոր ցեղասպանություններին՝ մենք պահանջում ենք, որ բազում զրկանքներ, պատերազմ, ավեր ու արյուն տեսած Արցախ աշխարհում և ամենուր հավերժ թևածի խաղաղությունը»:
Միջոցառմանը ելույթ է ունեցել նաև «Մռակած» պետական կամերային երգչախումբը:
Նշենք, որ ջահերթին մասնակցում էր ԱՀ ԱԺ փոխնախագահ Վահրամ Բալայանը, ԱԺ պատգամավորներ, ուսանողներ, երիտասարդական հասարակական կազմակերպությունների ներկայացուցիչներ, զինվորականներ, հոգևորականներ և այլք:
