Հայաստանի Առաջին Հանրապետության 100-ամյակին նվիրված՝ Ստեփանակերտում կազմակերպվել է ցուցահանդես (տեսանյութ)
ԱՀ մշակույթի, երիտասարդության հարցերի և զբոսաշրջության նախարարության և Հայաստանի ազգային արխիվի համատեղ նախաձեռնությամբ Ստեփանակերտի մշակույթի և երիտասարդության պալատում այսօր կազմակերպվել է «Արցախը 1918-1920թ.թ.» խորագրով ցուցահանդես՝ նվիրված Հայաստանի Առաջին Հանրապետության 100-ամյակին:
Հայաստանի Առաջին Հանրապետության 100-ամյակին նվիրված՝ Ստեփանակերտում կազմակերպվել է ցուցահանդես (տեսանյութ)
ՍՏԵՓԱՆԱԿԵՐՏ, մայիսի 28, ԱՐՑԱԽՊՐԵՍ: Ցուցահանդեսին ներկայացվել են Հայաստանի ազգային արխիվում պահպանված Արցախին վերաբերող 1918-1920 թվականների փաստաթղթերի և լուսանկարների շուրջ 250 կրկնօրինակներ:
«Արցախպրես»-ի թղթակցի հաղորդմամբ՝ ցուցահանդեսին ԱՀ մշակույթի, երիտասարդության հարցերի և զբոսաշրջության նախարար Սերգեյ Շահվերդյանն ասել է, որ Հայաստանի Առաջին Հանրապետության հռչակումից հետո այսօր ունենք վերածնված Արցախի և Հայաստանի Հանրապետություններ:
Նա նշել է, որ ցուցահանդեսին ներկայացված նմուշները փաստում են մայիսյան հերոսամարտերի ժամանակ արցախահայության մասնակցության մասին:
Արցախի պետական պատմաերկրագիտական թանգարանի տնօրեն Մելանյա Բալայանի խոսքով էլ՝ Արցախում առաջին անգամ է ներկայացվում նման ցուցահանդես:
«Ցուցահանդեսի շեշտադրումը դրվել է Արցախը 1918-1920 թվականներին, այսինքն՝ ՀՀ գոյության ժամանակաշրջանում Արցախում տիրող իրավիճակին: Կարծում եմ՝ սա առաջին փորձն է մեր պատմության այդ արժանի ժամանակահատվածի ուսումնասիրման համար»,-նշել է Մ. Բալայանը: Թանգարանի տնօրենն ավելացրել է նաև, որ Արցախում իրենք պատրաստվում են ստեղծել առավել պատճաշ պատմության թանգարան, որտեղ հնարավորություն կլինի Արցախի պատմությունը առավել ընդգրկուն ու բովանդակալից ներկայացնելու համար: Արցախի ապագա թանգարանի ցուցադրությունը համալրելու նպատակով է իրականացվում նաև այսօրվա ցուցահանդեսը, որտեղ ներկայացված են հետաքրքիր նմուշներ՝ Հայաստանի Առաջին Հանարապետության դրոշը, ծննդով արցախցի գործիչների՝ Դանիել և Պողոս-Բեկ Փիրումյանների լուսանկարները և այլ ուշագրավ վավերագրեր:
Հայաստանի ազգային արխիվի առաջատար արխիվագետ Գևորգ Կեսոյանն էլ ասել է, որ արցախահայությունը մեծ մասնակցություն է ունեցել մայիսյան հերոսամարտերի կերտման գործում:
Ինչպես Սարդարապատում, Բաշ-Ապարանում, Ղարաքիլիսիայում մղված ճակատամարտերում, այնպես էլ Արցախի տարածքում թուրք- ազերիների դեմ ծավալած ռազմական գործողություններում Արցախը միշտ էլ պայքարել է սեփական անկախության կերտման համար: Նա ավելացրել է, որ ցուցանմուշները մշտապես կմնան Արցախում:
Միջոցառմանը ներկա էին ԱՀ Ազգային Ժողովի նախագահ Աշոտ Ղուլյանը, ԱՀ ԱԺ փոխնախագահ Վահրամ Բալայանը, պատգամավորներ, ՀՀ-ից ժամանած հյուրեր, ովքեր շրջայց են կատարել ցուցահանդեսում և ծանոթացել նմուշներին: