ՍՏԵՓԱՆԱԿԵՐՏ, մայիսի 31, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նիստին բացման խոսքով հանդես է եկել ԱԺ նախագահ Աշոտ Ղուլյանը, ով, շնորհավորելով ներկաներին մայիսյան տոների կապակցությամբ, ասել է, որ մայիս ամսվա ընթացքում Խորհդարանը շարունակել է Սահմանադրությամբ իրեն վերապահված գործառույթների պատշաճ իրականացումը, մասնավորապես՝ ԱԺ մշտական հանձնաժողովներում կայացել են 2017 թ.-ի պետական բյուջեի կատարման հաշվետվությունների քննարկումները, որոնց մասնակցել է նաև գործադիր իշխանությունը: Այս կապակցությամբ աշխատանքներն ավարտման փուլում են, որին Խորհրդարանը կանդրադառնա հունիսին կայանալիք լիագումար նիստի ընթացքում:

 

ԱԺ նախագահի խոսքին հաջորդել է պատգամավոր Արսեն Առստամյանի առաջարկը՝ ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանի կողմից ներկայացված «Պետական գույքի մասնավորեցման 2010-2012 թթ. ծրագրի կատարման, 2017 թ.-ի տարեկան հաշվետվությունը հաստատելու մասին, «Տեխնիկական կանոնակարգման մասին», «Չափումների միասնականության ապահովման մասին», «Ստանդարտացման մասին» և «Հավատարմագրման մասին», ինչպես նաև ԱՀ կրթության, գիտության և սպորտի նախարար Նարինե Աղաբալյանի կողմից ներկայացված «Հանրակրթության մասին» ԼՂՀ օրենքում փոփոխություններ կատարելու մասին» հարցերը օրակարգից հանելու վերաբերյալ:

 

Պատգամավորի խոսքով՝ այդ կետերը նստաշրջանի օրակարգում ընդգրկվել են կանոնակարգի խախտումով, քանի որ ըստ կանոնակարգի 71-րդ հոդվածի 2-րդ մասի՝ գրավոր առաջարկները կարող են ներկայացվել նախագիծը շրջանառության մեջ դնելուց հետո՝ 1-ամսյա ժամկետում, իսկ նախագիծն ԱԺ-ի արտահերթ նստաշրջանի կամ նիստի օրակարգում ընդգրկելու դեպքում՝ 24 ժամվա ընթացքում:

Խորհրդարանի քվեարկության արդյունքում 3 հարցերը հանվել են նիստի օրակարգից:

 

Այնուհետև Խորհրդարանը փակ գաղտնի քվեարկության արդյունքում Գերագույն դատարանի դատավոր է նշանակել Հրայր Աբրահամյանին, իսկ Վերաքննիչ դատարանի դատավոր՝ Մարատ Ավանեսյանին:

 

Նիստի օրակարգում ընդգրկված էր նաև «ԱՀ Մարդու իրավունքների պաշտպանի 2017թ.-ի գործունեության մասին, ինչպես նաև մարդու իրավունքների և ազատությունների պաշտպանության վիճակի մասին» հաղորդումը, որը ներկայացրել է ԱՀ Մարդու իրավունքների պաշտպան Ռուբեն Մելիքյանը:

 

ԱՀ Հաշվեքննիչ պալատի 2017 թ.-ի գործունեության մասին տարեկան հաղորդումն է ներկայացրել ԱՀ Հաշվեքննիչ պալատի նախագահ Էռնեստ Ավանեսյանը, իսկ ԼՂՀ 2015-2017 թթ. Պետական վիճակագրական ծառայության կատարման հաշվետվությունը ներկայացրել է ԱՀ ազգային վիճակագրական ծառայության նախագահ Կարեն Ներսիսյանը:

 

Անցնելով օրենսդրական նախաձեռնություններին՝ Խորհդարանը երկրորդ ընթերցմամբ ընդունել է «Առևտրաարդյունաբերական պալատի մասին» օրենքը:

 

ԱՀ էկոնոմիկայի և արտադրական ենթակառուցվածքների նախարար Լևոն Գրիգորյանը ներկայացրել է «Գույքի նկատմամբ իրավունքների պետական գրանցման մասին» ԼՂՀ օրենքում լրացումներ և փոփոխություններ կատարելու մասին և «Պետական տուրքի մասին» ԼՂՀ օրենքում փոփոխություն կատարելու մասին հարցերը՝ նշելով, որ այդ օրենքներում նախատեսված փոփոխությունները պայմանավորված են 2012 թ.-ի հուլիսից սկսած անշարժ գույքի կադաստրի ոլորտում ինստիտուցիոնալ բարեփոխումների շարունակականության ապահովման անհրաժեշտությամբ՝ որպես նպատակ ունենալով համակարգի կողմից իրականացվող գործառույթների շարունակական պարզեցումը և բնակչությանը մատուցվող ծառայությունների որակի բարձրացումը:

 

Գլխադասային հանձնաժողովի եզրակացությունը ներկայացրել է ԱԺ արտադրության և արտադրական ենթակառուցվածքների հանձնաժողովի նախագահ Արպատ Ավանեսյանը՝ նշելով, որ հանձնաժողովում լիարժեք քննարկվել են բարձրացված բոլոր հարցերը, որոնց տրվել են սպառիչ պատասխաններ:

 

Օրակարգում ընդգրկված էր նաև «Դատախազության մասին» օրենքի նախագիծը, որը ներկայացրել է ԱՀ արդարադատության նախարար Արարատ Դանիելյանը:

 

Նիստի վերջում պատգամավորական հայտարարությամբ հանդես են եկել պատգամավորներ Հայկ Խանումյանը, Ալյոշա Գաբրիելյանը և Գագիկ Բաղունցը: