Արցախի պետական համալսարանի նախաձեռնությամբ այսօր՝ հունիսի 18-ին, ԱՀ Ազգային Ժողովի խմբակցությունների անդամները հանրապետության ներքաղաքական իրավիճակի վերաբերյալ հանդիպում-քննարկում են անցկացրել բուհի պրոֆեսորադասախոսական կազմի հետ:
Խորհրդարանական խմբակցությունները ներքաղաքական իրավիճակը քննարկել են մայր բուհում
ՍՏԵՓԱՆԱԿԵՐՏ, հունիսի 18, ԱՐՑԱԽՊՐԵՍ:«Արցախպրես»-ի թղթակցի հաղորդմամբ՝ քննարկման ժամանակ պատգամավորները և դասախոսները արտահայտել են իրենց տեսակետները, իրավիճակի կայունացման և երկրի անվտանգության խնդիրների շուրջ հանդես եկել առաջարկներով և կատարել մտքերի փոխանակում:
Համալսարանի պրոֆեսորադասախոսական կազմը բարձրացրել է երկրում տարբեր ոլորտներում առկա խնդիրները՝ միաժամանակ պահանջելով դրանց արդարացի լուծումները:
Քննարկումներին Ազգային Ժողովի «Հայրենիք» խմբակցությունից մասնակցում էր պատգամավոր Ռոմելա Դադայանը, «Դաշնակցություն»-ից՝ Դավիթ Իշխանյանը և «Ժողովրդավարություն»-ից՝ Վարդգես Բաղրյանը, ովքեր նաև պատասխանել են լսարանի կողմից բարձրացված տարաբնույթ հարցերին:
Դավիթ Իշխանյանը, խոսելով Արցախի ներքաղաքական իրավիճակի վերաբերյալ իրենց խմբակցության տեսակետի մասին, ասել է, որ «Դաշնակցությունը» բուռն քննարկումներ է ծավալել անցած 2 շաբաթների ընթացքում:
«Մեր պետականության նկատմամբ քաղաքական լուրջ «դիվերսիա» է իրականացվում, և շատ լուրջ վտանգված են մեր պետականությունը և սուբյեկտայնությունը: Մենք 2009 թվականից բարձրաձայնել ենք երկրում բարեփոխումների, կադրային և այլ փոփոխությունների մասին, բայց նույնիսկ մի շարք խնդիրների շուրջ իշխանությունների հետ համաձայն չլինելու դեպքում՝ երբեք չենք ցանկացել ԱՀ նախագահի հրաժարականը, որովհետև դրան հետևելու են մի շարք քաղաքական գործընթացներ, որոնք, մեր գնահատմամբ, ունեն արտաքին միջամտություն, որի արդյունքում կարող ենք լուրջ խնդիրների առաջ կանգնել: Սահմանադրությունը նախատեսում է Խորհրդարանի և նախագահական համաժամանակյա ընտրություններ, Սահմանադրական բարեփոխումներն առաջիկայում անխուսափելի են լինելու: Այն գործընթացները, որոնք ծավալվում են մեր ներքաղաքական կյանքում, ուղղակի լուրջ փոխկապակցված են մեր արտաքին մարտահրավերների հետ»,-մասնավորապես ասել է Դ. Իշխանյանը:
Նա, պատասխանելով ԱԺ ղեկավարի փոփոխության վերաբերյալ հարցին, տեղեկացրել է, որ Խորհրդարանի օրակարգում պաշտոնապես նման հարց չկա:
Վարդգես Բաղրյանն էլ ասել է, որ Արցախում տիրող մթնոլորտն անհանգստացնում է բոլորին:
Նա նշել է նաև, որ հունիսի 1-ից իրենք ԱԺ մյուս խմբակցությունների ներկայացուցիչների հետ տարբեր ձևաչափերով հանդիպումներ են ունենում՝ քննարկելով ստեղծված իրավիճակը, որն էլ խոսում է իրենց մտահոգության մասին:
Կադրային ոչ ճիշտ քաղաքականության մասին խոսելով՝ պատգամավորն նշել է, որ ԱԺ-ն այդ գործին սահմանադրորեն որևէ առնչություն չունի:
«Ես այն համոզմունքն ունեմ, որ քաղաքական ուժերը պետք է պատասխանատվություն կրեն նաև դրա համար: Մենք կիսում ենք ձեր բոլոր մտահոգությունները, բայց մենք ցնցումների տանող երկիր չունենք: Մենք պետք է հանդուրժողական լինենք միմյանց հանդեպ: Ցանկացած երկրում առողջ ընդդիմություն է պետք, բայց վերջնագրերով ու պայմաններով խոսելը իշխանությունների հետ պարզապես անթույլատրելի է»,-ավելացրել է Վ. Բաղրյանը:
Իսկ Ռոմելա Դադայանն էլ, խոսելով Ազգային Ժողովի գործունեության մասին, ասել է, որ յուրաքանչյուր պատգամավոր պատասխանատու է իր քայլի համար:
Խոսելով ԱԺ-ում վերջերս ստեղծված քննիչ հանձնաժողովի մասին՝ Ռ. Դադայանը՝ որպես այդ հանձնաժողովի նախագահի տեղակալ, նշել է, որ իրենք աշխատում են անել առավելագույնը՝ փորձելով պատասխանել հանրային հնչեղություն ունեցող բոլոր հարցերին:
«Ազատ Հայրենիք» կուսակցության տարանջատման մասին բարձրացված հարցին Ռ. Դադայանը պատասխանել է, որ որ նման բան չկա:
«Գործել ու շարունակում ենք գործել այնպես , ինչպես սկսել ենք: Կուսակցության ղեկավար Արայիկ Հարությունյանը նպատակ ունի էլ ավելի ամրապնդելու և կուռ դարձնելու «Ազատ Հայրենիք» կուսակցությունը: Մենք միշտ իշխանության կողքին ենք եղել, և, ինչքանով կարողացել, օգնել և շարունակում ենք օգնել՝ որպես իշխանամետ կուսակցւթյուն, և որևէ ընդդիմադիր քայլ անելու մտադրություն չունենք»,-նշել է նա:
