Մարտակերտի շրջանի Նոր Մարաղա համայնքը գազաֆիկացված չէ, ունի հանդիսությունների տան և մանկապարտեզի կարիք:
Նոր Մարաղան ունի հանդիսությունների տան և մանկապարտեզի կարիք. համայնքի ղեկավար (լուսանկարներ)
ՍՏԵՓԱՆԱԿԵՐՏ, օգոստոսի 2, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Նոր Մարաղայի համայնքի ղեկավար Ռոմա Կարապետյանը:
Ամեն տարի Նոր Մարաղայում միջինը ծնվում է 10-11 երեխա, իսկ մահացությունների թիվը կազմում է 2-3 հոգի:
Համայնքի ղեկավարը նշել է, որ 2004 թվականին Թեհրանի Հայոց թեմի միջնորդությամբ տեր և տիկին Վարուժան և Ալմա Հովհաննիսյանների ֆինանսավորմամբ Նոր Մարաղայում կառուցվել է դպրոց, որը նախատեսված է 50 աշակերտի համար: Սակայն գյուղի բնակչության աճի հետ կապված, այժմ կարիք է զգացվում դպրոցի շենքն ընդլայնելու: Դպրոցում ներկայումս սովորում է 83 աշակերտ: Նախադպրոցականների թիվը 60 է: 2018-2019 նոր ուսումնական տարում առաջին դասարան կհաճախի 8 աշակերտ:
Խոսելով գյուղի այլ խնդիրների մասին՝ Ռ. Կարապետյանն ասել է, որ առաջնահերթերից համայնքում ապրող բազմազավակ ընտանիքներին բնակարանով ապահովելու հարցն է:
««Հայաստան» համահայկական հիմնադրամի միջոցներով վերջին 6 տարիների ընթացքում շուրջ 10 բնակարան է կառուցվել գյուղի բազմազավակ ընտանիքների համար: Ասեմ, որ օգոստոսի 1-ին, Տորոնտոյի «Հայաստան» հիմնադրամի ֆինանսավորմամբ, «Մեր տունը» ծրագրի շրջանակներում, մեր համայնքում ևս մեկ բազմազավակ ընտանիք բնակարամուտ է տոնել: Ներկայումս ունենք 3 բազմազավակ ընտանիքներ ևս, որոնց բնակարանային հարցը դեռ լուծված չէ: Առաջիկայում 8 ընտանիքներ սպասում են իրենց 5-րդ երեխաներին. նրանց մասին ևս պիտի հոգ տարվի»,-ավելացրել է համայնքի ղեկավարը:
Նա ավելացրել է, որ 2015 թվականին «Հայաստան» համահայկական հիմնադրամի միջոցներով գյուղում կառուցվել է նաև համայնքային կենտրոն, ինչպես նաև 2016 թվականին համայնքին է նվիրաբերվել շտապօգնության մեքենա: Համայնքային կենտրոնում ներառված է բուժկետ և ակումբ:
Ռ. Կարապետյանի խոսքով՝ Նոր Մարաղայի բնակչությունը հիմնականում զբաղվում է անասնապահությամբ, հողագործությամբ և այգեգործությամբ: Համայնքի բնակիչները մշակել են 250 հա ցորեն, 150 հա գարի և 40 հա եգիպտացորեն. վերջինիս բերքահավաքը շուտով կսկսվի: Նախորդ տարվա համամեմատ այս տարվա ցորենի և գարու բերքատվությունից համայնքի ղեկավարն այնքան էլ գոհ չէ՝ կապված եղանակային պայամաններից:
Գյուղն ունի 30 հա նռան այգի, որը ըստ Ռ. Կարապետյանի հետագայում կավելանա ևս 50 հա-ով:
Խոսելով անասնապահությունից՝ համայնքի ղեկավարը տեղեկացրել է, որ համայնքում կան 100 գլուխ խոշոր և 250 գլուխ մանր եղջերավոր անասուներ, մոտ 1000 թև թռչուն: Բնակչությունը խոզբուծությամբ գրեթե չի զբաղվում. պատճառը բնակիչության մեջ առկա վախն է խոզերի աֆրիկյան ժանտախտ հիվանդությամբ վարակվելուց:
Նոր Մարաղան ունի շուրջօրյա ջրամատակարարում:Միջհամայնքային ճանապարհների վիճակը բարվոք է:Նոր մարաղեցիները հնարավորություն ունեն օգտվելու համացանցից:
