Արցախի թիվ 11 ընտրատարածքում սեպտեմբերի 9-ին կկայանա ԱԺ մեծամասնական ընտրակարգով պատգամավորական ընտրություններ:
«Վստահեք, եւ կհաղթեք դուք». պատգամավորի թեկնածու Տիրան Աթանեսյանը ներկայացնում է նախընտրական ծրագրի առաջնահերթությունները
ՍՏԵՓԱՆԱԿԵՐՏ, օգոստոսի 27, ԱՐՑԱԽՊՐԵՍ: «Արցախպրես»-ը զրուցել է ինքնառաջադրմամբ հանդես եկող պատգամավորի թեկնածու Տիրան Աթանեսյանի հետ:
- Պարո ՛ն Աթանեսյան, պատգամավորի թեկնածու եք առաջադրվել մի ընտրատարածքում, որն ընդգրկում է Շահումյանի ամբողջ շրջանը, ինչպես նաև Մարտակերտի ու Ասկերանի շրջանների մի մասը: Ինչո՞վ է պայմանավորված հենց այդ ընտրատարածքում Ձեր ինքնաառաջադրումը:
- Ծնվել եւ մանկությունս անց եմ կացրել Մարտակերտի շրջանի Առաջաձոր գյուղում, որտեղ վերջերս նորոգել ենք մեր պապենական տունը: Համարյա ամեն շաբաթ լինում եմ գյուղում, ինչպես նաեւ՝ Վանքում, որտեղ ապրում են մորս ծնողները: Այդ եւ շրջակա գյուղերում ունեմ հարյուրավոր հասակակիցներ, որոնց հետ ջերմ հարաբերություններ ունեմ: Հենց նրանք են ինձ հուշել պատգամավորի թեկնածու առաջադրվելու գաղափարը: Տասը տարի է՝ աշխատում եմ ԱՀ «Գյուղի եւ գյուղատնտեսության աջակցության» հիմնադրամում, հանրապետության բոլոր համայնքներից հազարավոր մարդկանց հետ եմ շփվել: Գիտեմ նրանց բնավորությունը, խնդիրները: Ահա այդ ռեսուրսով էլ պատգամավորության թեկնածու եմ առաջադրվել:
- Որո՞նք են Ձեր նախընտրական ծրագրի առաջնահերթությունները: Կնշե՞ք այն կետերը, որոնց ուղղությամբ ըստ Ձեզ, կան առաջնահերթ անելիքներ՝ պատգամավոր ընտրվելու պարագայում:
- Նախընտրական ծրագրիս հիմնադրույթները բրոշյուրի տեսքով տարածել եմ: Հիմնականում կանգ եմ առել արտաքին քաղաքականության եւ անվտանգության, տնտեսության եւ սոցիալական ոլորտի վրա: Կարեւորում եմ Արցախի խնդրի խաղաղ-բանակցային կարգավորումը, որը պետք է ամրագրի մեր անկախության միջազգային ճանաչումը՝ մեր ժողովրդի անվտանգությունը եւ խաղաղ զարգացումը երաշխավորող սահմաններում: Տնտեսության առումով շեշտը դրված է ազատ մրցակցության եւ հավասար պայմաննների գերակայության վրա: Հատուկ կետով անդրադարձել եմ գյուղատնտեսական կոոպերացիայի եւ բանկային ու վարկային կարգավորման հարցերին: Կարեւոր եմ համարել կրթության ոլորտի կառավարման ազատականացումը, Երիտասարդության մասին նոր օրենքի ընդունումը: Մենք պետք է պահպանենք եւ զարգացնենք նաև մեր մշակութային ինքնատիպութունը:
- Օգոստոսի 7-ից մեկնարկել է քարոզարշավը, երևի թե արդեն տարբեր համայնքներում ունեցել եք հանդիպումներ: Ի՞նչ հարցերի վերաբերյալ են քաղաքացիների հիմնական մտահոգությունները և ի՞նչ մոտեցումներ եք նախանշել՝ պատգամավոր ընտրվելու պարագայում այդ խնդիրներին անդրադառնալու և անհրաժեշտ լուծումներ ապահովելու համար:
- Արդեն տասնյակ հանդիպումներ եմ ունեցել: Եւ զգացել եմ, որ տարածքային զարգացման անհամամասնություններ կան: Ինչու՞, ասենք, Շահումյանի շրջանի Ականաբերդ գյուղը գազաֆիկացված չէ: Դա այն դեպքում, որ հարեւան՝ Մարտակերտի շրջանի Հաթերք եւ Զագլիկ գյուղերում այդ հարցը վաղուց է լուծված: Շահումյանի շրջանում բարձրացնում են նման հարցեր: Կարծում եմ, որ այդ շրջանը պետք է ունենա ազատ տնտեսական եւ հարկային արտոնությունների գոտու կարգավիճակ: Մյուս տեղերում իրավիճակն անհամեմատ բարվոք է, կան խնդիրներ, որ հեշտ լուծելի են: Քաղաքական առումով մարդկանց հուզում է Արցախի հիմնահարցը: Երիտասարդությունը բարձրացնում է բարեփոխումների հարցը: Եկող տարի սպասվում են ՏԻՄ ընտրություններ: Կարծում եմ, այդ հարցերի մեծ մասը կգտնի քաղաքական կարգավորումը: Մենք արժանի ենք ապրելու իրոք օրենքի գերակայության, ժողովրդավարական եւ բարեկեցիկ երկրում, բայց դրան հասնելու համար յուրաքանչյուրս պետք է ներդնի իր հնարավորությունների առավելագույնը: Ես գալիս եմ ծառայելու այդ գործին: Իմ կարգախոսն է՝ «Վստահեք, եւ կհաղթեք դուք»: Իսկ Ազգային ժողովում իմ խոսքը լինելու է ընտրողների հավաքական ասելիքը:
Հարցազրույցը՝ Դավիթ Աբաղյանի
