ՍՏԵՓԱՆԱԿԵՐՏ, 22 նոյեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նիստին ֆինանսաբյուջետային և տնտեսական կառավարման հարցերի մշտական հանձնաժողովի նախագահ Արամ Գրիգորյանը նշել է, որ ԱՀ ԱԺ կանոնակարգ օրենքի 81-րդ հոդվածի երկրորդ մասի համաձայն՝ Հանրապետության Նախագահը պետական բյուջեի նախագիծը կանոնակարգով և «ԼՂՀ բյուջետային համակարգի մասին» ԼՂՀ օրենքով սահմանված կարգով Խորհրդարանի քննարկմանն է ներկայացնում բյուջետային տարին սկսելուց առնվազն 45 օր առաջ, որն էլ Ազգային ժողով էր ուղարկվել նոյեմբերի 15-ին:

Այնուհետև ԱՀ ֆինանսների նախարար Արթուր Հարությունյանը խորհրդարանականների ուշադրությանն է ներկայացրել է նախագծով նախանշված հիմնական ցուցանիշները՝ ընդգծելով, որ 2019 թվականի պետական բյուջեի նախագիծը մշակվել է` հաշվի առնելով ԱՀ Նախագահի 2017-2020 թթ. ծրագրի նպատակադրումները: Դրանք, ըստ Ա. Հարությունյանի, միտված են ինչպես կայուն տնտեսական աճի ապահովմանը, այնպես էլ տնտեսության գերակա ոլորտների զարգացմանն ու գործարար միջավայրի բարելավմանը:

«Կատարված մակրոտնտեսական կանխատեսումների համատեքստում 2019 թ.-ի պետական բյուջեի ցուցանիշները ծրագրվել են եկամուտների գծով 112 մլրդ 340.9 մլն դրամ, ծախսերի գծով՝ 110 մլրդ 987.7 մլն դրամ, դրա արդյունքում պրոֆիցիտը կկազմի` 1 մլրդ 353.2 մլն դրամ, որը կուղղվի նախկինում ներգրավված փոխառու միջոցների մարմանը: Պետական բյուջեի սեփական եկամուտները ծրագրվել են 54,7 մլրդ. դրամի չափով, որը 2018 թ.-ի համար պլանավորված եկամուտների նկատմամբ ավել է 1.7 մլրդ դրամով կամ 3.2 %-ով: Այդ թվում հարկային եկամուտները և պետական տուրքերը կկազմեն 54,2 մլրդ դրամ կամ ընթացիկ տարվա համար պլանավորված եկամուտներից ավել շուրջ 2.8 %-ով, որի արդյունքում կանխատեսումային «Հարկեր/ՀՆԱ» հարաբերակցությունը կկազմի 16.4 %»,- մանրամասնել է Ա. Հարությունյանը:

Ֆինանսների նախարարի խոսքով՝ նախագծով առաջարկվող բյուջետային ծախսերի ծավալների, կազմի ու կառուցվածքի ձևավորման ժամանակ առաջնորդվել են բյուջետային նորմատիվների և ծախսային ուղենիշերի, ինչպես նաև ֆինանսական կարգապահության կանոնների խիստ պահպանման սկզբունքով, որն իր հերթին կանխատեսվել է տնտեսության զարգացման տեմպերի ապահովմանն ուղղված: