Այսօր՝ դեկտեմբերի 4-ին, Շուշիի տեխնոլոգիական համալսարանում կազմակերպվել է կլոր սեղան-քննարկում, որի ընթացքում ուսանողների կողմից բարձրացվել են մի շարք հարցեր:
Շուշիի տեխնոլոգիական համալսարանը կունենա նոր պայմաններ. կազմակերպվել է կլոր սեղան-քննարկում
ՍՏԵՓԱՆԱԿԵՐՏ, 4 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ քննարկմանն ուսանողներն անդրադարձել են դասավանդման մեթոդների փոփոխությանը, դասախոսների տարիքային սահմանափակմանն ու վերապատրաստմանը, տարբեր մշակութային միջոցառումներին լավ սովորող ուսանողների ակտիվությանն ու սպորտդահլիճի բացակայությանը վերաբերող հարցերին: 
Ի պատասխան ներկայացված հարցերի՝ քննարկմանը ներկա բուհի հոգաբարձուների խորհրդի նախագահ, տեխնիկական գիտությունների թեկնածու Արայիկ Հարությունյանն ասել է, որ նախ և առաջ պետք է փոխվի ուսուցման ձևաչափը:
Ի պատասխան ներկայացված հարցերի՝ քննարկմանը ներկա բուհի հոգաբարձուների խորհրդի նախագահ, տեխնիկական գիտությունների թեկնածու Արայիկ Հարությունյանն ասել է, որ նախ և առաջ պետք է փոխվի ուսուցման ձևաչափը:
«Պետք է կազմակերպել արտաժամյա լսումներ, կլոր սեղաններ, քննարկումներ: Դասախոսի դերը ուսանողի կայացման գործում պետք է արժևորվի նրա տարիների փորձով, վաստակով, անցած ճանապարհով, որոնք յուրաքանչյուր երիտասարդի մոտ սովորելու ցանկություն կառաջացնեն: Ուսանողների հետ պետք է տարվի հոգեբանական աշխատանք՝ անհատի մեջ բարձրացնելով եսը: Բայց այս բոլոր խնդիրներից զատ, ներկայումս մենք կանգնած ենք մարդկության առջև ծառացած կարևոր մարտահրավերների առաջ:
Այսօր ամեն ինչ անցնում է ավտոմատացման, և ներկա ժամանակներում ուսանողը պետք է հաշվի առնի, որ 20 տարի հետո բոլոր համակարգերն աշխատելու են այդ ռեժիմով: Ուսանողներին օգնելու հարցում պատրաստ ենք ցանկացած աջակցության: Արդեն հունվարից սկսելու ենք գործնական քայլեր ձեռնարկել այդ ուղղությամբ»,- նշել է Ա. Հարությունյանը՝ տեղեկացնելով, որ Սարուշենում տեղակայված «Տոհմային կայան»-ում այս տարի կիրականացվի նախագիծ, ըստ որի կստեղծվեն արդի չափանիշներին համապատասխան պայմաններ, որպեսզի ուսանողները կարողանան փորձուսուցում անցնել:
Բացի դրանից, համալսարանի գյուղատնտեսական բաժնի ուսանողներին կհատկացվի մասնագիտացված շրջիկ մեքենա, որը հնարավորություն կտա այցելել դաշտեր և տեղում ծանոթանալ կատարվող աշխատանքներին՝ այդ կերպ արտադրական փորձուսուցումը իրականացնելով ավելի արդյունավետորեն:
Քննարկմանը ներկա ՇՏՀ դասախոս Կարեն Ներսիսյանն ասել է, որ ուսանողների կողմից բարձրացված խնդիրները երկկողմանի են՝ կախված ինչպես դասախոսներից, այնպես էլ սովորողներից:
«Ուսանողը սովորելու համար պետք է ունենա մոտիվացիա և պատկերացնի իր տեղը աշխատաշուկայում: Այսօրվա դասախոսը չպետք է կարդա դասախոսությունը կամ էլ թելադրի այն: Պետք է սովորեցնել՝ ինչպես սովորել: Սա շատ կարևոր է, քանի որ ուսանողների համար այսօր հասանելի է համացանցը, և իրենք ևս կարող են գտնել այդ դասախոսությունները: Ինչ վերաբերում է դասախոսների որակի հարցին, կարծում եմ, եթե տարեվերջին անցկացվի սոցհարցում և դրա հիման վրա կատարվի դասաբաշխում, ավելի ճիշտ մոտեցում կլինի: Շուշիի տեխնոլոգիական համալսարանն այն պրոյեկտն է, որ միտված է դեպի ապագան: Անցած երկու տարիների ընթացքում հաստատությունն ապացուցել է, որ կան որոշակի նվաճումներ, և այստեղ մեծ է ուսանողների ձգտումը»,- ավելացրել է Կ. Ներսիսյանը:
ՇՏՀ դասախոս Գագիկ Բաղունցն էլ ողջունել է նման ձևաչափով հանդիպումները՝ ընդգծելով, որ համալսարանի կայացման, զարգացման խնդիրն անհնար է լուծել, եթե չլինի թիմի միասնական ընկալում:
«Պետք է դնել հստակ խնդիր, թե ինչի ենք մենք ձգտում, և ունենալ նպատակ, այն է՝ պատրաստել մասնագետներ Արցախի համար: Այս հարցում հիմնական բեռն ընկած է ուսանողների վրա: Խնդիրը ոչ միայն ուսանողների, այլև մեր բոլոր դասախոսների ուշադրության կենտրոնում պետք է լինի»,- նշել է Գ. Բաղունցը:
Իսկ ՇՏՀ դասախոս Արտակ Ղուլյանը նշել է, որ ներկայացված խնդիրները ոչ միայն Արցախի, այլև հետխորհրդային բոլոր երկրների համար են արդիական:
«Պետք է հստակեցնել մեր առջև դրված խնդիրները, և կրթությունը դարձնել անկյունաքար տնտեսության մեջ: Եվ դա կդառնա հեռանկարային ծրագիր»,- ասել է Ա. Ղուլյանը:
Կլոր սեղան-քննարկմանն ուսանողներն անդրադարձել են նաև մի շարք այլ հարցերի, հանդես եկել նոր առաջարկներով և ցանկություն հայտնել, որ նման ձևաչափով հանդիպումները լինեն շարունակական:
