Հայաստանը պատրաստվում է խորացնել տնտեսական հարաբերությունները Թուրքմենստանի հետ:
Հայաստանն ու Թուրքմենստանն ամրապնդում են տնտեսական կապերը մի շարք ոլորտներում
ՍՏԵՓԱՆԱԿԵՐՏ, 23 ԴԵԿՏԵՄԲԵՐԻ, ԱՐՑԱԽՊՐԵՍ։ Ասիական պետության հետ համագորակցությունը հիմնականում ընդգրկելու է վառելիքաէներգետիկ, տրանսպորտի և կապի, ստանդարտացման և պետական վերահսկողության, առողջապահության, գյուղատնտեսության, կրթության և գիտության ոլորտները:
Երևանում անցկացվող Հայաստանի և Թուրքմենստանի միջև տնտեսական համագործակցության միջկառավարական հանձնաժողովի 6-րդ նիստի ժամանակ այս մասին հայտարարեց ՀՀ էներգետիկայի և բնական պաշարների նախարար, հանձնաժողովի հայկական կողմի համանախագահ Երվանդ Զախարյանը:
Նրա խոսքով` Թուրքմենստանի հետ Հայաստանի այսօրվա հարաբերությունները տնտեսական ոլորտում դեռևս բավարար չեն: «Ընդհանուր ապրանքաշրջանառությունը մոտ 12.5 մլն դոլարի սահմաններում է, որը բավականին ցածր ցուցանիշ է, մինչդեռ դա ավելացնելու հնարավորությունները մեծ են: Հանձնաժողովի աշխատանքները պետք է ուղղված լինեն դրան: Մենք պետք է ապահովենք երկկողմ կապերի ընդլայնումը և ավելացնենք առևտրի ծավալները»,- ընդգծեց նա: Զախարյանը հիշեցրեց, որ այս տարի ապրիլին տեղի է ունեցել ՀՀ նախագահ Սերժ Սարգսյանի այցը Թուրքմենստան, որի շրջանակում ստորագրվել են մի շարք համաձայնագրեր տարբեր բնագավառներում, այդ թվում արտաքին հարաբերությունների, էներգետիկայի, գյուղատնտեսության, մշակութի բնագավառներում: Նա նաև տեղեկցրեց, որ նախատեսվում է ստորագրել ևս մեկ համաձայնագիր Մատենադարանի և Թուրքմենստանի Ազգային ակադեմիայի լեզվի ինստիտուտի համապատասխան մարմինների միջև:
Թուրքմենական կողմի համանախագահ, Թուրքմենստանի փոխվարչապետ Սապարդուրդի Տոյլիևն էլ նշեց, որ իրենց պատվիրակությունը ցանկանում է քննարկել նաև ներդրումային հարցեր: «Մենք ցանկանում ենք ամրապնդել կապերը բազմապիսի ոլորտներում, ինչի համար կարևոր է նաև փոխադարձ ներդրումները միմյանց երկրներում: Հայաստանը մեզ համար պոտենցիալ գործընկեր է տնտեսական բնագավառում: Մենք ունենք հնարավորություն ավելացնելու առևտրի ծավալները»,- ասաց Տոյլիևը:
Հայ- թուրքմենական միջկառավարական հանձնաժողովի 6-րդ նիստի օրակարգում ընդգրկված էին երկու երկրների տնտեսության տարբեր ոլորտներին առնչվող հարցեր: Կողմերը պայմանավորվեցին հանձնաժողովի 7-րդ նիստն անցկացնել Աշգաբադում 2015 թվականին, իսկ մինչ այդ նրանք ստորագրեցին Հայաստանի և Թուրքմենստանի միջև տնտեսական համագործակցության միջկառավարական հանձնաժողովի 6-րդ նիստի արձանագրությունը: