Հայոց ցեղասպանության 100-ամյա տարելիցին առնչվող բոլոր միջոցառումներն ու արարողությունները մեր հիշողությունն են, մեր վիշտն են, և ակնկալիքների կարիքը չկա, որ Բարաք Օբաման կամ Ֆրանսիայի պառլամենտը ասեն մեզ այն, ինչը մենք արդեն գիտենք:
Հայոց ցեղասպանությունը մեր վիշտն է, և կարիք չունենք, որ Օբաման ասի այն, ինչ գիտենք. Ռիչարդ Կիրակոսյան
ՍՏԵՓԱՆԱԿԵՐՏ, 25 ԴԵԿՏԵՄԲԵՐԻ, ԱՐՑԱԽՊՐԵՍ։ Tert.am-ի հետ զրույցում նման կարծիք հայտնեց Տարածաշրջանային հետազոտությունների կենտրոնի տնօրեն Ռիչարդ Կիրակոսյանը՝ ի պատասխան հարցի, թե 2015-ին, երբ Հայաստանը պետք է նշի Հայոց ցեղասպանության 100-ամյա տարելիցը, Հայաստանը կկարողանա՞ շահել այն քարոզչությունից, որը պարտարդրված է անել՝ որպես հակազդեցություն Թուրքիայի գործողություններին, քանզի երբ ակնկալիքները մեծ են լինում, հիասթափությունն էլ մեծ է լինում:
Ռիչարդ Կիրակոսյանն ավելացրեց. «Ցեղասպանության 100-ամյա տարելիցի հետ կապված՝ ակնհայտ է, որ բոլոր նրանք, ովքեր ժխտում են այդ փաստը, հանդես են գալիս որպես բարոյապես սնանկ: Հայտարարությունները, որոնք գալիս են ԱՄՆ-ից կամ մեկ այլ երկրից, ավելի շատ նրանց խայտառակելու համար են: Ցեղասպանության ճանաչման ամենակարևոր դաշտը հիմա թուրքերի կողմից ճանաչումն է»:
Հարցին՝ բնականաբար՝ 2015-ին և առաջիկա տարիներին նման բան Թուրքիայից չեք սպասում, քաղաքագետը պատասխանեց, որ հարցը սպասել-չսպասելը չէ:
«Եթե Թուրքիայի տեսանկյունից նայենք, ապա Թուրքիայում սպասողական դրություն է, որովհետև իրականում բոլոր թուրքերը, որոնք արդեն ճանաչել են Ցեղասպանությունը, պահանջում են իրենց կառավարությունից, որպեսզի նա ևս ճանաչի:
Եվ թուրքական կառավարության այն արշավը, որը միլիոնավոր դոլարներ է դնում՝ ապահովելու Ցեղասպանության ժխտումը, ավելի է մեկուսացնում կառավարությունը»,-հայտարարեց Ռիչարդ Կիրակոսյանը:
Նա առաջարկում է ուշադրություն դարձնել այն հանգամանքին, որ որոշ պետություններ, որոնք անգամ գոյություն էլ չունենին Հայոց ցեղասպանության ժամանակ, ինչպիսին օրինակ՝ Ադրբեջանն է, ժխտում են Հայոց ցեղասպանությունը:
Որքան էլ սա մեր վիշտն ու մեր հիշողութունն է, այնուհանդերձ, կա կարծիք, որ քարոզչական առումով շատ մեծ անելիք ունեն հայ հանրահայտ արվեստագետները, մտավորականներն ու մշակութային գործիչները, ինչպես օրինակ՝ Սերժ Թանկյանը, ով ոչ միայն ապրիլին գալու է Հայաստան, այլև՝ իր հետ բերելու է հոլիվուդյան հանրահայտ աստղ Ջորջ Քլունիին:
Ի պատասխան հարցի, թե իրե՞նք ինչ կարող են անել և կարո՞ղ են, արդյոք, պետությունից շատ բան անել այս առումով, քաղաքագետն ասաց.«Անկեղծ ասած՝ այնպիսի մարդիկ, ինչպիսին Սերժ Թանկյանն է, բավականին շատ բան են արել և անում են, բայց Թանկյանն այլ հարցերի շարքում մտահոգված է նաև Հայաստանում մարդու իրավունքների հարցերով: Այսինքն՝ մենք չպետք է ավելին ակնկալենք Սփյուռքի մշակույթի հետ կապ ունեցող անձանցից, պետք է ավելին պահանջենք մեր կառավարությունից ու մեր քաղաքացիներից»:
