Հայաստանում մինչև տարեվերջ զբոսաշրջիկների թիվը կարող է հասնել 1.250.000` ապահովելով շուրջ 15 տոկոսի աճ:
Զբոսաշրջությունը դինամիկ աճ է գրանցում
ՍՏԵՓԱՆԱԿԵՐՏ, 26 ԴԵԿՏԵՄԲԵՐԻ, ԱՐՑԱԽՊՐԵՍ։ Այս մասին տարեվերջյան ամփոփիչ ասուլիսի ժամանակ հայտարարեց ՀՀ էկոնոմիկայի նախարար Կարեն Ճշմարիտյանը` նշելով, որ այս տարվա 10 ամսում Հայաստան է այցելել ավելի քան 941 հազար զբոսաշրջիկ: «Հայաստանը մասնակցել է 9 միջազգային հեղինակավոր զբոսաշրջային ցուցահանդեսների, դրանցից 4-ին ապահովվել է նաև ԼՂՀ մասնակցությունը: Գովազդատեղեկատվական համակարգի կատարելագործման նպատակով տպագրվել և տարածվել են բազմալեզու գովազդային բրոշյուրներ Հայաստանի և հայկական զբոսաշրջային արդյունքի վերաբերյալ»,- «Արմենպրես»-ի հաղորդմամբ` ասաց նա:
Նախարարը խոսեց նաև ուղևորահոսքերի ավելացման մասին` նշելով, որ այս տարի «Զվարթնոց» միջազգային օդանավակայանի ուղևորահոսքը աճել է 23.3 տոկոսով` կազմելով 1 մլն 898 հազար ուղևոր: «Ավելացել է չվերթների քանակը, իսկ հունվար-հոկտեմբերին ավիատոմսերի գները նվազել շուրջ 12.1 տոկոսով»,- ասաց Ճշմարիտյանը:
Նա տեղեկացրեց, որ այս տարի կազմակերպվել են զբոսաշրջության ոլորտի ներկայացուցիչների ճանաչողական այցեր: «Ֆրանսիայի նախագահի պետական այցի շրջանակում կազմակերպվել է ֆրանսիական զբոսաշրջային 50 գործակալների և ԶԼՄ-ների տասնյակից ավելի ներկայացուցիչների ճանաչողական այց: Ֆրանսիական «Lagardere» մեդիահոլդինգի` վավերագրական ֆիլմերի ոլորտում մասնագիտացված դուստր ձեռնարկության` «Electron libre» հետ համագործակցությամբ նկարահանվել է Հայաստանը ներկայացնող ֆիլմ, որը ցուցադրվելու է ֆրանսիական «France 5» և «Ushuaia» հեռուստաալիքներով»,- ասաց նա:
2014թ. հունվար-սեպտեմբերին հանրապետություն է այցելել շուրջ 941 հազար 151 զբոսաշրջիկ` աճը նախորդ տարվա համեմատ կազմել է 13.6 տոկոս: Նույն ժամանակահատվածում ներքին զբոսաշրջիկների թիվը կազմել է 785 հազար 180, աճը` 33.7 տոկոս: 2014 թվականին հայաստանում շահագործման են հանձնվել հինգ հյուրանոց` «Ռեպուբլիկա», «Դայմոնդ Հաուս», «Փարիզ», «Պանորամա Ռեզորթ», «Մուլտի Գրանդ» և 33 նոր հյուրանոցային համարներով համալրվել է «Արմենիա Մարիոթ» հյուրանոցը: