Եվրասիական տնտեսական հանձնաժողովի (ԵԱՏՀ) կոլեգիայի նախագահ Տիգրան Սարգսյանը Regnum-ին տված հարցազրույցում խոսել է ԵԱՏՄ շրջանակում գազի, նավթի ու նավթամթերքի ընդհանուր շուկաների ստեղծման ֆոնին գազի գնի նվազման հավանականության մասին:
«ԵԱՏՄ տարածքում գազի, նավթի և նավթամթերքի ընդհանուր շուկաների ստեղծման գործընթացը հեշտ չի առաջ գնում». Տիգրան Սարգսյան
ՍՏԵՓԱՆԱԿԵՐՏ, 5 մարտի, ԱՐՑԱԽՊՐԵՍ: Տիգրան Սարգսյանն ընդգծել է, որ թեև գազի, նավթի և նավթամթերքի ընդհանուր շուկաների ստեղծման գործընթացը բավականին լուրջ քայլ է դեպի առաջ, սակայն դժվար է առաջ գնում, կան մի շարք վիճելի հարցեր, որոնցից մեկը՝ ինչպես է ձևավորվելու գազի տարանցման համար գինը, հայտնում է Tert.am-ը:
«Մենք այս հարցը պետք է լուծենք արդեն 2019 թվականին: Բոլոր երկրներն էլ հետաքրքրված են, որ գազի տարանցիկ գինը նվազագույն լինի և որ գազի գինը հավասար մրցակցային պայմանների ստեղծման հնարավորություն ընձեռի: Գազի ընդհանուր շուկայի ձևավորման՝ 2016թ. մայիսին հատատված հայեցակարգի համաձայն՝ ԵԱՏՄ շրջանակում նախատեսված է գազի բորսային առևտուր: Այսինքն՝ դրա գինը ձևավորվելու է շուկայի հիմնական սկզբունքներից ելնելով: Շուկայական գնագոյացմանն անցումը, այդ թվում՝ ընդհանուր շուկայում գազի բորսային առևտրի ստեղծումը, և ոչ խտրական հիմքով գազի տարանցման սակագների ձևավորումը կնպաստի շուկայի մասնակիցների թվի ավելացմանն ու սպառողների համար գազի գնի կայունացմանը»,-ասել է Տիգրան Սարգսյանը՝ կանխատեսելով Միության անդամ պետություններում գազիֆիկացման մակարդակի, ինչպես նաև գազի սպառման ծավալի աճ:
Հայ պաշտոնյան ընդգծել է, որ ԵԱՏՄ շրջանակում գազի, նավթի և նավթամթերքի, ինչպես նաև էլեկտրաէներգիայի ընդհանուր շուկաների ձևավորումը կհանգեցնի արդյունավետության բարձրացմանը, ինչը նշանակում է, որ անարդյունավետ ընկերությունները դուրս կմնան շուկայից:
«Դրան պետք է նախապատրաստվել: Ուստի՝ ազգային կառավարությունները պետք է արդեն այսօր մտածեն այն մասին՝ ինչ մեխանիզմներ է հարկավոր իրագործել այդ ամենն անցավ դարձնելու համար»,-եզրափակել է ԵԱՏՀ կոլեգիայի նախագահը: