Կապանի «Գանձասարի» սերբ պաշտպան Գորան Օբրադովիչը, կապ հաստատելով armsport.am-ի հետ, կայքի միջոցով Սերբիային օգնության ձեռք մեկնելու խնդրանք է հղել Հայաստանի Հանրապետության կառավարությանը։
Գանձասարի սերբ խաղացողը ջրհեղեղից տուժած իր երկրին օգնելու խնդրանքով դիմել է Հայաստանին
Կապանի «Գանձասարի» սերբ պաշտպան Գորան Օբրադովիչը, կապ հաստատելով armsport.am-ի հետ, կայքի միջոցով Սերբիային օգնության ձեռք մեկնելու խնդրանք է հղել Հայաստանի Հանրապետության կառավարությանը։
Սերբիայի ամբողջ տարածքում, ներկայում արտակարգ դրություն է, որի պատճառը հորդառատ անձրևների հետևանքով առաջացած աննախադեպ հեղեղումներն են։ Հազարավոր մարդիկ երկրին պատուհասած բնական աղետի պատճառով մնացել են անօթևան, իսկ հեղեղներին զոհ գնացածների թիվը հատել է 40-ի սահմանը։
«Հայերը և սերբերը միշտ էլ եղբայրական ժողովուրդներ են եղել։ Հայտնի է, որ Սպիտակի երկրաշարժի լուրը լսելուն պես սերբերն առաջինն են մեկնել Հայաստան՝ օգնության նպատակով։ Այժմ Սերբիան է հայտնվել ծանրագույն ողբերգության մեջ, հազարավոր մարդիկ մնացել են բախտի քմահաճույքին։
Ես խնդրում եմ Հայաստանին՝ օգնել իմ երկրին, որտեղ մարդիկ մահանում են նույնիսկ խմելու ջրի սղության պատճառով։ Հիմա մենք ցանկացած բանի կարիք ունենք։ Այժմ ես արձակուրդի մեջ եմ, և անձամբ իմ ու ընտանիքիս հետ ամեն ինչ կարգին է, բայց մեզնից մի քանի կիլոմետր հեռավորության վրա մարդիկ են զոհվում։ 1999 թվականին մեզ ռմբակոծել են, բայց նույնիսկ այդ ժամանակ այսքան ծանր ու արտակարգ իրավիճակ չէր»,-նշեց Գորանը armsport.am-ի հետ ունեցած հեռախոսազրույցում։
Ավելացնենք, որ այժմ բազմաթիվ սերբ մարզիկներ, օգտագործելով իրենց հեղինակությունը, դիմում են աշխարհի տարբեր պետությունների իշխանություններին՝ անհրաժեշտ և հույժ կարևոր աջակցության խնդրանքով։
