Սաութլենդի հայկական համայնքի ավելի քան 1500 անդամներ և կողմնակիցներ շաբաթ հավաքվել էին Փասադենայում Հայոց ցեղասպանությանը նվիրված երկար սպասված հուշարձանի բացմանը։
Փասադենայում բացվել է Հայոց ցեղասպանության երկար սպասված հուշարձանը
ՍՏԵՓԱՆԱԿԵՐՏ, 20 ԱՊՐԻԼԻ, ԱՐՑԱԽՊՐԵՍ։ Pasadena Star News-ի փոխանցմամբ՝ հիշատակի այգում գտնվող հուշարձանը հարգանքի տուրք է 1.5 մլն հայերին, ովքեր սպանվել են 1915-1923 թթ. օսմանյան թուրքերի ձեռքով։ Բացումը տեղի է ունեցել Հայոց ցեղասպանության 100-րդ տարելիցից մեկ շաբաթ առաջ։
Հուշարձանի բացումը ծրագրվել է 3 տարի։ Այն բացվել է ծափողջույնների ներքո, որին հաջորդել է տարածաշրջանի պաշտոնյաների և հայ հոգևորականության մասնակցությամբ արարողությունը։
«Դժվար է մեզ համար հասկանալ, ընկալել 1.5 մլն մարդկանց մահը։ Այնուհանդերձ, մենք բոլորս ունենք պատասխանատվություն համոզվելու, որ բոլորը տեղյակ են մարդկության պատմության այդ ողբերգական և վարկաբեկող իրադարձությունից,- ասել է քաղաքապետ Բիլ Բոգարդը:- Մենք պետք է ամեն ինչ անենք՝ երաշխավորելու, որ նման դեպքերն ապագայում չկրկնվեն»։
Հուշարձանը կազմված է մետաղական եռոտանուց, որը հիշեցնում է նույնպիսի եռոտանիները, որոնցից հայ առաջնորդներին կախել են Ցեղասպանության ժամանակ։ Եռոտանու գագաթից ամեն 21 վայրկյանը մեկ մեկ կաթիլ ջուր է թափվում։ Ներքևում գտնվող ավազանը կթափվի տարեկան 1.5 մլն կաթիլ ջուր։ Նախագծի հեղինակը ուսանող դիզայներ Քեթրին Մենարդն է։
Լոս Անջելեսի շրջանային կառավարիչ Մայք Անտոնովիչն ասել է, որ ինքն ու իր գործընկեր կառավարիչները ծրագրում են նախագահին և Կոնգրեսին ուղղված նամակ հեղինակել նրանց հաջորդ հանդիպմանը՝ ասելու. «Բավական՝ նշանակում է բավական։ Ճանաչման ժամանակն է»։