Հայաստանի ուսանողական մարզական ֆեդերացիայի պատվիրակությունը Հարավային Կորեայի Գվանգջու քաղաքում կմասնակցի 28-րդ Համաշխարհային ուսանողական մարզական խաղերին (Ունիվերսիադա):
ՀՀ-ը Հարավային Կորեայում կմասնակցի Համաշխարհային ուսանողական մարզական խաղերին
ՍՏԵՓԱՆԱԿԵՐՏ, ՀՈՒՆԻՍԻ 26, ԱՐՑԱԽՊՐԵՍ։ Հուլիսի 3-ին մեկնարկող խաղերին Հայաստանը մասնակցելու է 22- հոգիանոց թիմով՝ 12 մարզիկ, 6 մարզիչ, 2 մրցավար և 2 այլ ներկայացուցիչ:
Պատվիրակության ղեկավար, Հայաստանի ուսանողական մարզական ֆեդերացիայի նախագահության անդամ, սպորտի վարպետ, մանկավարժական գիտությունների թեկնածու, դոցենտ Հովհաննես Գաբրիելյանը լրագրողների հետ զրույցում հունիսի 26-ին նշեց, որ ֆեդերացիան 1995 թվականից մասնակցում է ուսանողական խաղերին:
«Այս տարվա խաղերին մասնակցում են 170 երկրների պատվիրակություններ: Մենք մրցելու ենք 6 մարզաձևերում՝ սուսերամարտ, ձյուդո, թաեքվոնդո, սպորտային մարմնամարզություն, լող և թենիս», նշեց Հովհաննես Գաբրիելյանը:
Նրա խոսքով՝ այս Ունիսվերսիադայի ծրագրում չկա շախմատ, ըմբշամարտ, բոքս, ծանրամարտ: «Մենք մարզիկներ ունենք, որոնք իրենց լավ են դրսևորել տարբեր միջազգային մրցաշարերում»,-ակնկալիքների մասին խոսելով՝ հավելեց Հովհաննես Գաբրիելյանը: Պատվիրակության ղեկավարի խոսքով՝ ընտրվել են լավագույնները, իսկ Հայաստանը տարբեր տարիներին մեծ թվով մեդալներ է նվաճել Ունիսվերսիադաներում:
Լիլիթ Էվոյանն արդեն վեց տարի սուսերամարտով է զբաղվում: «Մասնակցել եմ տարբեր միջազգային մրցումների, և առաջին անգամ եմ մասնակցում Ունիսվերսիադային: Ակնկալիքները մեծ են, հույս ունեմ, որ կվերադառնանք հաղթանակով»,-նշեց նա:
Ունիսվերսիադայի մասնակից հայ մարզիկները փաստում են, որ ջանք չեն խնայել, լավ են պատրաստվել և հաղթանակի մեծ հույս ունեն: