Գարնանացան աշխատանքները հիմնականում ավարտված է. կատարվել է ավելի քան 17 հազար հա հերկ, ինչը նախորդ տարվա նույն ժամանակահատվածի համեմատությամբ ավել է շուրջ 5 տոկոսով:
Ամեն ինչ արվում է բերքահավաքը անկորուստ իրականացնելու համար
Գարնանացան աշխատանքները հիմնականում ավարտված է. կատարվել է ավելի քան 17 հազար հա հերկ, ինչը նախորդ տարվա նույն ժամանակահատվածի համեմատությամբ ավել է շուրջ 5 տոկոսով: Այս տարի՝ հունիսի 16-ի դրությամբ, ըստ գյուղատնտեսության նախարարությունում գրանցված տվյալների, ցանվել է 15056.3 հա գարնանացան կուլտուրաներ, ինչը նախորդ տարվա համեմատությամբ 456 հա-ով ավել է։
Այս մասին «Արցախպրես»-ի թղթակցին տեղեկացրեց գյուղնախարարության բուսաբուծության և բույսերի պաշտպանության բաժնի պետ Վիլեն Ավետիսյանը, ով նշեց, որ շուրջ 11 հազար հա գարնանացան հացահատիկային կուլտուրաներ են, իսկ մնացած հողատարածքներում՝ այլ գյուղատնտեսական կուլտուրաներ՝ հատիկաընդեղեն, բանջարաբոստանային բույսեր, անասնակերեր։ Բերքահավաքի համար տարված նախապատրաստական աշխատանքների մասին Վ. Ավետիսյանը մասնավորապես ասաց. «Ձևավորվել է օպերատիվ շտաբ` գյուղատնտեսության նախարարի գլխավորությամբ, որում ընդգրկված են ԼՂՀ ԿԱ արտակարգ իրավիճակների պետական ծառայությունը, ոստիկանությունը, առողջապահության նախարարությունը, շրջակա միջավայրի և բնական ռեսուրսների վարչությունը և մեր բոլոր վարչական շրջանների համապատասխան ներկայացուցիչները։
Արվում է ամեն ինչ՝ բերքահավաքը անվտանգ ու անկորուստ կազմակերպելու, ինչպես նաև առաջացած խնդիրներին տեղում օպերատիվ լուծում տալու համար»: Բերքահավաքի ժամանակ հակահրդեհային միջոցառումների իրականացման նպատակով հատկացվել է ավելի քան 27.5 մլն դրամ: Իսկ բերքահավաքին ներգրավված կոմբայնների տեխնիկապես պատրաստված լինելը ապահովելու համար մի շարք կոմբայննավարների տրամադրվել են դրամական միջոցներ: Կարկտահարության վնասների մասին խոսելիս մեր զրուցակիցը նշեց,որ տեղացած կարկուտի պատճառով զգալի վնաս են կրել Ասկերանի, Հադրութի, Մարտակերտի, Մարտունու և Քաշաթաղի շրջանները: Արցախում կարկտահարությունից ընդհանուր առմամբ տուժել են ավելի քան 5600 հա ցանքատարածություններ: