Մեկնարկում է Մայր Աթոռ սուրբ Էջմիածնի «Ուրախ Ամանոր սահմանում» ծրագիրը: Ծրագրի շրջանակներում մայրաքաղաքում տոնական գնումներ կատարող բնակիչներին հնարավորություն կտրվի որևէ նվեր գնել սահմանամերձ բնակավայրերի բնակիչներին:
Մայր Աթոռի նոր ծրագիրն ուրախ Ամանոր կպարգևի սահմանամերձ գյուղերին
ՍՏԵՓԱՆԱԿԵՐՏ, դեկտեմբերի 14, ԱՐՑԱԽՊՐԵՍ-ԱՐՄԵՆՊՐԵՍ: «Արմենպրես»-ի մամուլի սրահում հրավիրված ասուլիսին Մայր Աթոռ սուրբ Էջմիածնի սոցիալական ծառայության տնօրեն Տեր Մարկոս քահանա Մանգասարյանը նշեց, որ առանձնացված են Երևանի 5 սուպերմարկետներ` Արաբկիր, Դավթաշեն, Կենտրոն վարչական շրջանների «Երևան սիթի» խոշոր սուպերմարկետները և «Քարֆուր»-ը:
«Շեշտը դնում ենք շնորհավորանքի, այդ մարդկանց Ամանորի և Սուրբ Ծննդյան տոներին ուրախություն պարգևելու վրա: Այսինքն, նպատակը ոչ թե սահմանամերձ շրջանի բնակիչներին սոցիալապես աջակցելն է, այլ շնորհավորելը»,-ասաց Տեր Մարկոս քահանա Մանգասարյանը:
Դեկտեմբերի 19-ին ժամը 11.00-ից մինչև 20.00-ը նշված սուպերմարկտների մուտքերի և դրամարկղերի մոտ կլինեն շուրջ 100 կամավորներ: Նրանք գնորդներին կտրամադրեն ծրագրի վերաբերյալ տեղեկատվական թերթիկներ: Ցանկալի է, որ սահմանամերձ բնակիչների համար նախատեսված գնումները լինեն քաղցրավենիքի, գրենական պիտույքների, խաղալիքների, տնտեսական ապրանքների, պարենային սննդամթերքի տեսքով:
«Մենք շատ ենք խոսում, որ սահմաններն ամուր են ոչ միայն զինվորներով, այլև այնտեղ ապրող մարդկանցով: Սա էլ փոքրիկ առիթ է, որ կարողանանք մեր հոգատարությունը ցույց տալ սահմանամերձ բնակավայրերի բնակիչներին և փոխանցել մեր ջերմությունը»,-նշեց սոցիալական ծառայության տնօրենը:
Ստացված նվերները կտեղափոխվեն Մայր Աթոռ սուրբ Էջմիածին, որտեղ կտեսակավորվեն ու ուկուղարկվեն Իջևան: Ծրագրի շրջանակում ստացված նվերները տրամադրվելու են Իջևանի տարածաշրջանի սահմանամերձ 8 գյուղերին: Այդ օրը Իջևանում կանցկացվի համերգային մեծ միջոցառում, որից հետո նվերները կբաշխվեն համայնքապետերի, տեղի հոգևորականների միջոցով:
