«Արցախն ամեն տարի մասնակցում է խոշոր զբոսաշրջային ցուցահանդեսներին և քայլեր ձեռնարկում զբոսաշրջային բարենպաստ երկրի իմիջ ձևավորելու համար: Եվ ահա ամեն տարի զբոսաշրջային  ցուցահանդեսներում նույն իրավիճակն է. ադրբեջանական կողմը ջանքեր է գործադրում, որ կասեցնի Արցախի մասնակցությունը: Մեր ոչ մի մասնակցություն չի անցնում առանց նման միջադեպերի»,-ասաց Սերգեյ Շահվերդյանը:

Նրա խոսքով, սկզբում ադրբեջանցիներն աշխատում են պաշտոնական խողովակներով, բողոքում են կազմակերպիչներին կամ տվյալ երկրի արտաքին գերատեսչությանը: Սերգեյ Շահվերդյանի խոսքով, երբ ջանքերն ապարդյուն են անցնում, իրենք ցուցահանդեսի կազմակերպիչների համար փորձում են ստեղծել անընդունելի իրավիճակ, որպեսզի այդ ձևով պարտադրեն իրենց կամքը և չեզոքացնեն Արցախի մասնակցությունն այդ ցուցահանդեսներին: Ըստ նրա` փորձը ցույց է տալիս, որ նրանց քայլերն արդյունք չեն տալիս:

Ադրբեջանի նման քայլին Արցախի պատվիրակությունն ականատես եղավ Բեռլինում կայացած «ITB» միջազգային ցուցահանդեսին: Ադրբեջանցիները խոչընդոտել էին Արցախի տաղավարի աշխատանքները:

«Ընդհանուր առմամբ Բեռլինի ցուցահանդեսին մեր մասնակցությունն արդյունավետ ենք գնահատում: Առաջին երկու օրը գործարար հանդիպումներ էին, մեր պատվիրակությունն արդյունավետ աշխատանք է իրականացրել: Հաջորդ օրերին ցուցահանդեսն արդեն բաց էր հանրության համար: Այդ ժամանակ Ադրբեջանը սկսեց ապակայունացնող միջոցներ ձեռնարկել: Նախ փակեցին իրենց տաղավարը` տեղադրելով քաղաքական բնույթի պաստառներ, ինչն արգելված է ցուցահանդեսների կազմակերպիչների կողմից: Այնուհետև մի խումբ ադրբեջանցիներ փորձել են դրոշներով փակել մեր տաղավարը, ինչպես նաև դեպի մեր տաղավար տանող մուտքը: Դա արդյունք չտվեց, կազմակերպիչների միջոցառումների շնորհիվ հնարավոր եղավ կասեցնել»,-ասաց Արցախի էկոնոմիկայի նախարարության Զբոսաշրջության վարչության ծրագրերի պատասխանատու Արտակ Գրիգորյանը: Նրա խոսքով՝ դրանից հետո Արցախի տաղավարը հանգիստ շարունակել է աշխատանքը:  Ըստ Արտակ Գրիգորյանի` Ադբեջանի նման քայլերը ոչ միայն կասեցվում են, այլև հակառակ արդյունքն են ունենում: Նման դեպքերից հետո Արցախի տղավարի նկատմամբ հետաքրքրությունն ավելի է մեծանում:

Հաջորդ միջազգային զբոսաշրջային ցուցահանդեսը, որին Արցախը մասնակցելու է, կայանալու է Մոսկվայում` մարտի 22-ին: MITT միջազգային  զբոսաշրջային ցուցահանդեսին Արցախը մասնակցում է առաջին անգամ: