Մեր, համար առաջին նպատակը Ղարաբաղյան հիմնախնդրի վերջնական լուծումն է:
Ռոյսի ու Շերմանի առաջարկները ստացել են Մինսկի խմբի համանախագահների աջակցությունը
ՍՏԵՓԱՆԱԿԵՐՏ, 23մարտի, ԱՐՑԱԽՊՐԵՍ: Այս մասին հայտարարել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը՝ «Ամերիկայի ձայնին» տված հարցազրույցում։
«Հրադադարի խախտման փորձերը մեծ անհանգստության առիթ են հանդիսանում մեզ համար, մեկ տարի առաջ հունվար ամսին գրանցված բախումները ռեկորդային դարձան հրադադարի կնքումից ի վեր։ Ամենաանհանգստացուցիչը խաղաղ բնակչության կրած կորուստներն են, մենք քննադատում ենք ծանր հրետանու գործածումը»,-նշել է ամերիկացի համանախագահը:
Դեսպան Ուորլիքը խոսել է նաեւ ԱՄՆ-ի Կոնգրեսում շրջանառության մեջ դրված Ռոյս-Շերման նամակի մասին։ ԱՄՆ-ի նախագահին ուղղված ԱՄՆ-ի որոշ կոնգրեսականների կողմից ստորագրված այս նամակը Ղարաբաղում խաղաղության պահպանման ծրագրեր է ներկայացնում։ Առաջարկությունների թվում է սահմանային գոտում ԵԱՀԿ Մինսկի խմբի կողմից վերահսկվող, կրակի ուղղությունը որսացող սարքերի տեղադրումը, ինչպես նաեւ շփման գծում ԵԱՀԿ դիտորդների տեղակայումը, զինադադարը ավելի արդյունավետ վերահսկելու նպատակով։
Համանախագահ Ուորլիքը նշեց, որ թեեւ նամակը դեռ վերջնական հաստատում չի ստացել Մինսկի համանախագահները աջակցում են, խաղաղության պահպանմանն ուղղված այս գործընթացներին։
«Թեեւ մենք վերջնական նամակը դեռ չենք տեսել, այդուհանդերձ առաջարկները որոնք արվել են Ներկայացուցիչների պալատի արտաքին հարաբերությունների հանձնաժողովի նախագահ Էդ Ռոյսի կողմից, ստացել են Մինսկի խմբի համանախագահների աջակցությունը։ Մեր նպատակն է աշխատել կողմերի հետ համաձայնության հասնելու նպատակով։ Մենք պահանջում ենք զինադադարի պահպանում»,- նշել է Ջեյմս Ուորլիքը՝ հավելելով, որ ղարաբաղյան հիմնախնդրի երկարատեւ լուծումը գլխավոր առաջնահերթություն է։