Այսօր տեղի ունեցած ԼՂՀ Ազգային ժողովի ի թիվս օրակարգում ընդգրկված հարցերի քննարկվել է նաև «ԼՂՀ վարչատարածքային բաժանման մասին» ԼՂՀ օրենքում փոփոխություն կատարելու մասին» օրենքի նախագիծը։ Առաջարկվող փոփոխությունը վերաբերում է գործող օրենքում Հադրութի շրջանի Առաջամուղ գյուղական համայնքի կազմում նոր բնակավայրի՝ Արաքսավան գյուղի ամրագրմանը։
Արցախում նոր համայնք է ստեղծվել` Արաքսավան
Այսօր տեղի ունեցած ԼՂՀ Ազգային ժողովի ի թիվս օրակարգում ընդգրկված հարցերի քննարկվել է նաև «ԼՂՀ վարչատարածքային բաժանման մասին» ԼՂՀ օրենքում փոփոխություն կատարելու մասին» օրենքի նախագիծը։ Առաջարկվող փոփոխությունը վերաբերում է գործող օրենքում Հադրութի շրջանի Առաջամուղ գյուղական համայնքի կազմում նոր բնակավայրի՝ Արաքսավան գյուղի ամրագրմանը։
Դրական էր գլխադասային հանձնաժողովի նախագահ Գագիկ Պետրոսյանի եզրակացությունն, ով իր խոսքում նշեց, որ վերջերս մի խումբ պատգամավորների հետ այցելել են նոր համայնք և անձամբ ծանոթացել կատարված աշխատանքներին: «Առիթից օգտվելով ուզում եմ կոչ անել կառավարությանը ընդլայնելու ներդրվող միջոցների ծավալները մեր երկրի այդ հատվածում, քանի որ այն իսկապես ռազմավարական նշանակություն ունի»,-ասաց Գ. Պետրոսյանը:
Ինչպես «Արցախպրես»-ին տեղեկացրեցին ԼՂՀ ԱԺ մամլո ծառայությունից, կառավարության լիազորմամբ նիստում քննարկվել են նաև մի շարք օրենքներում փոփոխություններ և լրացումներ կատարելու հարցեր: Մասնավորապես, ներկայացնելով «Քաղաքացիական ծառայողների վարձատրության մասին» ԼՂՀ օրենքում փոփոխություններ և լրացումներ կատարելու մասին» օրենքի նախագիծը, աշխատանքի և սոցիալական հարցերի նախարար Սամվել Ավանեսյանը հաղորդեց, որ օրինագծով առաջարկվում է հստակեցնել մի շարք իրավական հարաբերություններ՝ քաղաքացիական ծառայողների աշխատավարձի բնականոն աճի սահմանման հիմքը և պարգևատրման կարգը, նրանց տրվող դրամական օգնության դեպքերն ու պայմանները, օրենքում օգտագործվող որոշ հիմնական հասկացություններ և այլն։
Դրական էր գլխադասային՝ սոցիալական և առողջապահության հարցերի մշտական հանձնաժողովի (նախագահ՝ Արամ Գրիգորյան) եզրակացությունը։ Առարկություններ չհարուցելով՝ օրենքն ընդունվեց։
«Թմրամիջոցների և հոգեմետ նյութերի մասին» ԼՂՀ օրենքում փոփոխություններ և լրացումներ կատարելու մասին», «Լիցենզավորման մասին» ԼՂՀ օրենքում փոփոխություններ և լրացում կատարելու մասին» և «Պետական տուրքի մասին» ԼՂՀ օրենքում փոփոխություններ կատարելու մասին» օրենքների նախագծերը նիստում քննության առնվեցին օրենսդրական փաթեթի տեսքով։ Համապատասխան հիմնավորումներով ներկայացնելով այն, առողջապահության նախարար Զոյա Լազարյանը հաղորդեց, որ «Թմրամիջոցների և հոգեմետ նյութերի մասին» օրենքում գործածվող հասկացություններն այդպիսով համապատասխանեցվում են միջազգային չափանիշներին, ինչից էլ բխում են փաթեթի մյուս օրինագծերում առաջարկվող փոփոխություններն ու լրացումները։
Նկատի առնելով, որ խնդրո առարկա հարցն առանձին բաղկացուցիչներով առնչվում է նաև բժշկական կրթական հաստատությունների, նպատակահարմար գտնվեց լսել նաև այդ նպատակով նիստին հրավիրված կրթության և գիտության նախարար Սլավա Ասրյանի տեսակետը։ Այն դրական էր, ուստի գլխադասային՝ սոցիալական և առողջապահության հարցերի մշտական հանձնաժողովն առաջարկեց օրինագծերն ընդունել վերջնական օրենքների տեսքով։ Խորհրդարանը կողմ քվեարկեց առաջարկությանը։
Ավարտելով օրենսդրական բնույթի հարցերի քննարկումները, նիստն այնուհետև ի գիտություն լսեց նոր նստաշրջանում առաջին տարեկան հաղորդումները՝ ԼՂՀ դատախազության (գլխավոր դատախազ՝ Արշավիր Ղարամյան) և ԼՂՀ քաղաքացիական ծառայության խորհրդի (խորհրդի նախագահ՝ Բորիս Առուշանյան) 2013թ. գործունեության մասին։
Ըստ օրակարգի, կառավարության անդամների մասնակցությամբ տեղի ունեցավ նստաշրջանում առաջին՝ օրենսդիր-գործադիր հարցուպատասխանի ընթացակարգը։ Պատգամավորների բարձրացրած հարցերը վերաբերում էին հանրապետության կենսագործունեության տարբեր բնագավառների ու ոլորտների։