Արցախում քաղաքական ուժերի նախաձեռնած սահմանադրական բարեփոխումների նախապատրաստությունները մտնում են նոր փուլ. նախագահ Բակո Սահակյանի հրամանագրով մասնագիտական հանձնաժողով է ձևավորվել, որտեղ Բակո Սահակյանը խոսել է այն ոլորտների և հարցերի մասին, որոնց պետք է անդրադառնան փոփոխությունները:
Ինչպես են ԼՂՀ քաղաքական ուժերը վերաբերվում սահմանադրական փոփոխություններին
ՍՏԵՓԱՆԱԿԵՐՏ, 28 մարտի, ԱՐՑԱԽՊՐԵՍ: Tert.am-ի հետ զրույցում ԼՂՀ ԱԺ «Հայրենիք» խմբակցության պատգամավոր Գագիկ Պետրոսյանն ասաց, թե դեռևս մայիսի 3-ի խորհրդարանական ընտրությունների ժամանակ «Ազատ Հայրենիք» կուսակցությունը սահմանադրական փոփոխություններ իրականացնելու առաջարկով է հանդես եկել: Դրանից հետո մյուս կուսակցություններն էլ են կիսել այդ տեսակետը:
«Հանձնաժողովը դեռ նոր է ստեղծվել և ոչ մի կոնկրետ դրույթի վրա դեռ կանգ չենք առել, հայեցակարգ պետք է ներկայացվի»,-ասաց Գագիկ Պետրոսյանն, ապա ավելացրեց. ««Ազատ հայրենիք» կուսակցության համար սահմանադրական փոփոխություններ իրականացնելու ամենաառանցքային կետերից մեկը կառավարման համակարգի փոփոխությունն է: Մենք գտնում ենք, որ խորհրդարանական կառավարման համակարգն ավելի արդյունավետ է»:
Հիշեցնենք, որ հանձնաժողովի անդրանիկ նիստում նշվել է, որ փոփոխությունները պետք է առնչվեն կառավարման համակարգին, որը պետք է ձերբազատվի ներքին հակասություններից և լիազորությունների կրկնությունից, ունենա իշխանության թևերի հստակ ձևակերպված զսպող և հակակշռող մեխանիզմներ։ Բարեփոխման պետք է ենթարկվի դատական համակարգը, նաև տեղական ինքնակառավարման ինստիտուտը:
Անդրադառնալով տեղական ինքնակառավարման ինստիտուտին, Գագիկ Պետրոսյանն ասաց, թե առաջարկություն կա, որ փոքր համայնքներում տեղական ինքնակառավարման մարմինների ընտրություններ չլինեն, մեծ համայնքներում՝ լինեն:
«Այսինքն՝ ավագանին ընտրվի, ավագանուց մի թեկնածու դառնա համայնքապետ, վարչական ղեկավարները ընտրովի լինեն, ոչ թե նշանակովի: Առաջարկությունների տարբեր ձևաչափեր կան, որոնցից դեռ որևէ մեկի վրա կանգն չենք առել: Հանձնաժողովը պետք է աշխատի, բոլոր առաջարկներում և՛ դրական կողմեր կան, և՛ բացասական»,-նշեց նա:
Գագիկ Պետրոսյանն ասաց, թե նույնը վերաբերում է դատական իշխանությանը. «Այսօր մենք չունենք սահմանադրական դատարան, ունենք սահմանադրական պալատ, առաջարկություններ կան, որ սահմանադրական դատարան լինի, առավել ևս, եթե ցանկություն կա անցնելու խորհրդարանական կառավարման համակարգի: Քննարկումների ընթացքում մենք կներկայացնենք մեր նկատառումները»:
«Ազգային վերածնունդ» կուսակցության նախագահ Հայկ Խանումյանը, սակայն, չի կարծում, թե սահմանադրական փոփոխությունների անհրաժեշտություն կա:
«Մեր կուսակցությունը դեմ է սահմանադրական փոփոխություններին, որովհետև գտնում ենք, որ տասը տարին մեկ սահմանադրություն չեն փոխում, որ դա վատ կանդրադառնա Արցախի միջազգային կերպարի վրա, և որ դա վատ նախադեպ կարող է դառնալ ամեն նոր իշխանության համար, քանի որ ամեն նոր իշխանություն կարող է իրեն ցանկալի կերպով փոխել իշխանությունը»,-ասաց Հայկ Խանումյանը:
Թեև իրենք դեմ են սահմանադրական փոփոխություններին, բայց որոշել են մասնակցել սահմանադրական փոփոխությունների գործընթացին, որպեսզի ներկայացնեն իրենց ընտրողների շահերը:
«Այս պահին որևէ նախագիծ չկա, բայց, ամենայն հավանականությամբ, հիմնական մեխը կառավարման համակարգն է լինելու: Մենք համակարգում ենք, որ այդ համակարգն իրեն 90-ականների սկզբին իրեն չի արդարացրել, մասնավորապես, Գերագույն խորհրդի նախագահ Արթուր Մկրտչյանի մահվանից հետո Արցախում լուրջ քաղաքական ճգնաժամ էր առաջացել և խորհրդարանը երկար ժամանակ չէր կարողանում խորհրդարանի ղեկավար ընտրել: Ի վերջո, քաղաքական ճգնաժամը բերեց պաշտպանության պետական կոմիտեի ստեղծմանը: Հետևաբար, կարծում եմ, որ պատերազմող երկրի համար այս մոդելն այնքան էլ հարմար չէ»,-եզրափակեց Հայկ Խանումյանը: