ՀՀ ՊՆ Ռազմական ավիացիոն ինստիտուտի պետ, գնդապետ Դանիել Բալայան այսօր արձագանքել է հրապարակումներին Հայաստանում անօդաչու թռչող սարքերի նախագծման ու արտադրման հեռանկարների մասին:
ՊՆ-ն արձագանքել է ԱԹՍ-ների մասին հրապարակումներին
ՍՏԵՓԱՆԱԿԵՐՏ, 9 ապրիլի, ԱՐՑԱԽՊՐԵՍ: Մեդիամաքսի հաղորդմամբ՝ գնդապետ Դանիել Բալայանն ասել է,-«Պաշտպանության նախարարությունը մի քանի ընկերությունների հետ համագործակցությունը ոչ թե կասեցրել, այլ սառեցրել է: Պատճառն այն է, որ որպես կանոն, սկզբնական փուլում ներկայացվում է մի գին, իսկ հետո` զգալիորեն ավելի բարձր գին՝ առանց լուրջ հիմնավորումների: Բնականաբար, այդ պարագայում առաջարկները մեր կողմից մերժվում են»:
Հայկական բանակի սպառազինության կազմում գտնվող «Կռունկ» անօդաչուներ թռչող սարքերը նախագծվել ու արտադրվել են ՀՀ ՊՆ կոնստրուկտորական ստորաբաժանումների կողմից, որոնք բազմիցս խորհրդատվություն են տրամադրել անօդաչուների մշակմամբ զբաղվող ընկերություններին ու անհատներին:
«ՊՆ-ն հիմա էլ պատրաստ է շարունակել համագործակցությունը ընկերությունների հետ, եթե ներկայացված առաջարկները համապատասխանեն բանակի պահանջներին ու խելամիտ գնային սանդղակում լինեն: ՊՆ ղեկավարության մոտեցումն այս հարցին մեկն է` ռազմաարդյունաբերական համալիրի արդիականացման համար հնարավորության սահմաններում աշխատել հենց հայկական ընկերությունների հետ: Դա ռազմական ծախսերին ուղղված գումարները կպահի երկրի ներսում, կզարգացնի ժամանակակից տեխնոլոգիաները, աշխատատեղեր կստեղծի ու ունեցած մոդելների հիման վրա մեզ թույլ կտա նոր սարքեր նախագծել»,- պատմել է գնդապետ Դանիել Բալայանը:
ՀՀ ՊՆ Ռազմական ավիացիոն ինստիտուտի պետը խոսել է նաև հայկական «Կռունկ» ԱԹՍ-ի մասին, որն առաջին անգամ ցուցադրվել էր 2012-ին կայացած ռազմական շքերթի ժամանակ:
«Նման անօդաչուների մեկ համալիրի գինը (2 ինքնաթիռ, մեկ ղեկավարման կայան) միջազգային շուկայում տատանվում է 2-2.5 մլն դոլարի սահմաններում: Հայաստանը սեփական ուժերով ու տասնյակ անգամներ ավելի քիչ միջոցներ ծախսելով կարողացավ ստեղծել «Կռունկը», որը լայն կիրառություն գտավ հայկական բանակում: Մեր սարքի տակտիկա-տեխնիկական բնութագիրը չի զիջում նույն դասում առկա իր անալոգներին»,- ասել է Դանիել Բալայանը:
