Ցանկացած բռնության դրսևորում դատապարտելի է:
ԼՂՀ ՄԻՊ-ը լիարժեք տիրապետում է իրավիճակին. ՀՀ ՄԻՊ
ՍՏԵՓԱՆԱԿԵՐՏ, 7 հունիսի, ԱՐՑԱԽՊՐԵՍ: Լրագրողների հետ ճեպազրույցում ասաց Հայաստանի մարդու իրավունքների պաշտպան Արման Թաթոյանը՝ պատասխանելով հարցին, թե ինչպե՞ս կգնահատեք ԼՂՀ Ազգային ժողովի ընդդիմադիր «Վերածնունդ» խմբակցության ղեկավար, «Ազգային վերածնունդ» կուսակցության նախագահ Հայկ Խանումյանին ծեծելու փաստը, հայտնում է panorama.am-ը:
«Այդ առումով օպերատիվ արձագանքեց Լեռնային Ղարաբաղի Հանրապետության մարդու իրավունքների պաշտպանը, այնպես որ այդտեղ իմ իրավասությունն ընդհանրապես չկա»,- նշեց նա:
ՄԻՊ խոսքով, այս պահին քննություն է ընթանում, այստեղ իրավասությունների տարանջատում հարց էլ կա:
«Լեռնային Ղարաբաղի Հանրապետության Մարդու իրավունքների պաշտպան Ռուբեն Մելիքյանը լիարժեք տիրապետում է իրավիճակին»,- հավելեց նա:
Հիշեցնենք, որ Հայկ Խանումյանին հունիսի 6-ին ծեծի ենթարկելու փաստի առթիվ հարուցվել է քրեական գործ։ Նկատենք, որ Խանումյանը իրեն ծեծելու վերաբերյալ ֆեյսբուքյան գրառման մեջ նշել էր, մասնավորապես, հետևյալը. «Ինձ ծեծելուց, ջարդելուց հետո, թուղթ են թելադրել, որը ես գրել եմ և ստորագրել, ինչպես նաև վիդեո են սարքել, որտեղ պահանջել են նշել, որ երեկվա դեպքերը սխալ են եղել: Ուզում եմ ասել, որ թղթի ստորագրումը և վիդեոն եղել են տակտիկական քայլ` բեսպրեդելի ձեռքից ազատվելու համար, նամանավանդ, որ արդեն կոտրված էին կողերս, քիթս, այտոսկրս և այլն: Վիդեոն և թուղթը իրենցից ոչ մի ուժ չունեն, քանզի իմ կողմից դրանք արվել են ուժեղ ցավերի և սպառնալիքների տակ»: