Այսօր Ստեփանակերտի տեղեկատվական տեխնոլոգիաների կենտրոնում «Ucom» ընկերության և տեղեկատվական տեխնոլոգիաների ձեռնարկությունների միության աջակցությամբ բացվել է «Արմաթ» ինժեներական լաբորատորիա:
Ստեփանակերտում բացվել է «Արմաթ» ինժեներական լաբորատորիա
ՍՏԵՓԱՆԱԿԵՐՏ, 7 հուլիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` Ստեփանակերտի տեղեկատվական տեխնոլոգիաների կենտրոնի տնօրեն Նարինե Ասծատրյանը, ողջունելով ներկաներին իր խոսքում նշել է, որ Արցախում առաջին անգամ է ինժեներական լաբորատորիա:
«Ինժեներական կրթությունն ու նրա կիրառումը տնտեսության մեջ և բիզնեսում այն ճանապարհն է, որով մեր երկիրը կհասնի մեծ նվաճումների: Մի քանի տարվա ընթացքում պետք է կարողանանք արցախյան բոլոր դպրոցների համար ինժեներական լաբորատորիաների առկայությունը իրականություն դարձնել: Քանի որ այն արդյունքը, որը այս ծրագրի ընթացքում ակնկալում ենք, մեծ հաջողություն է արձանագրելու:
Դրանով մենք հնարավորություն ենք տալու բացահայտելու և զարգացնելու մեր երեխաների տաղանդը. ունենալու ենք որակյալ մասնագետների մի հոծ բանակ, որն էլ կապահովի Արցախի տնտեսական կտրուկ վերելքը ամենաշահութաբեր այս ոլորտում:
Ապրիլյան վերջին իրադարձությունները ևս ցույց տվեցին, որ Արցախում պահանջված է ինժեներական մտքի զարգացումը: Արցախում գործող այս լաբորատորյաները կդառնան մեծ երաշխիքներ` մեր երկրում անվտանգ ապրելու և արարելու համար»,-ասել է Ն. Ասծատրյանը:
Ինֆորմացիոն տեխնոլոգիաների ձեռնարկությունների միության (ԻՏՁՄ) փոխտնօրեն Հայկ Չոբանյանն էլ նշել է, որ է «Արմաթ» ինժեներական լաբորատորիաներն արդեն տեղադրված են Հայաստանի 130 համայնքներում և դպրոցներում, իսկ այսօր էլ 131-րդն բացվել է Արցախում:
«Սա կարևորագույն մի միջոցառում է, որը այլընտրանք չունի այն պատճառով, որ այսօր ՏՏ ոլորտն աշխարհի ամենազարգացող ու պահանջված ուղղությունն է, և պահանջը մասնագետների աշխարհում անսահմանափակ է: 2017 թվականին աշխարհը կունենա շուրջ 3 մլն տեխնոլոգիական ոլորտի մասնագետների կարիք: Հայաստանն այս ոլորտում աշխատանքով չապահովված 3000-ից ավելի մասնագետ ունի:
Մենք նպատակ ենք դրել 4 տարվա ընթացքում այսպիսի լաբորատորիաներ ունենալ Հայաստանի բոլոր համայնքներում, և այդ ընթացքում մոտ 100 հազար երեխա ներգրավված կլինեն այս լաբորատորիաներում: Սովորել ցանկացող երեխաները 10 տարեկանից կարող են հաճախել լաբորատորիանոր: Կրթությունն իրականացվում է նախագծերի հիման վրա, և 4-5 տարիների ընթացքում երեխաները լուրջ գիտելիքներ կստանան, կմասնակցեն տարբեր նախագծերի, կհանգստանան ճամբարներում»,-մեկնաբանել է Հ. Չոբանյանը:
Հ. Չոբանյանի խոսքով` նախագիծը հնարավորություն է տալու գործնականորեն աջակցել Հայաստանի և համաշխարհային շուկայում որակյալ ՏՏ մասնագետների ինտեգրմանը: Հատկանշական է, որ խմբակներում մշակված ծրագրային փաթեթները, ինչպես նաև սարքավորումների գծագրերը բաց են հանրության համար։ Համակարգչային ծրագրերն ու համակարգերը հնարավորինս հայաֆիկացվում են, իսկ նախագծի իրականացման շրջանակներում սարքավորումներ և ծրագրային միջոցներ ձեռք բերելիս նախապատվություն է տրվում տեղական արտադրողին, ինչի վառ օրինակ են հանդիսանում Հայաստանում արտադրված բարձրակարգ եռաչափ (3D) տպիչները, մինի համակարգիչները, ռոբոտաշինության հավաքածուները և այլ սարքերը։
«Ucom» ընկերության գլխավոր տնօրեն Հայկ Եսայանն էլ նշել է, որ մեր ընկերությունը մշտապես եղել և մնալու է նման կրթական ոլորտում:
«Ինքս էլ ինժեներական կրթություն ստանալով` շատ եմ կարևորում ինժեներական մտքի ձևավորումը Արցախում և ՀՀ-ում: Սա շատ կարևոր է մեր երկրի ապագայի համար: Մեծ ներուժ ունենք այս ոլորտում, և այս փոքր լաբորատորյաներով մի քանի տարի հետո մենք տեսնելու ենք մեր երեխաների գիտելիքների արդյունքները, որոնք կօգտագործվեն մեր երկրի զարգացման ու շենացման գործի համար: Մենք պետք է ի հայտ բերենք այն երեխաներին, ովքեր ցանկություն ունեն սովորելու, արարելու և ստեղծագործելու, որոնք ես շատ կարևորում եմ»,- խոսքն ընդհանրացրել է Հ. Եսայանը:
Նորաստեղծ ինժեներական լաբորատորիայի բացման պատիվը տրվել է ՏՏ կենտրոնի երեխաներին, որից հետո ներկաները ծանոթացել են լաբորատորիաներին:
Միջոցառմանը ներկա էին ԼՂՀ էկոնոմիկայի նախարար Անդրանիկ Խաչատրյանը, ԼՂՀ կրթության, գիտության և սպորտի փոխնախարար Միքայել Համբարձումյանը, կրթության ոլորտի այլ ներկայացուցիչներ, կենտրոնի աշխատակիցներ, աշակերտներ և այլք: