Թումո ստեղծարար տեխնոլոգիաների կենտրոնում ընթանում է նոր ընդունելիություն, որին ներգրավվել են նաև Ասկերանի, Շուշիի, Իվանյանի, Նորագյուղի, Քարին Տակի 12-ից 18 տարեկան երեխաները:
Թումո ստեղծարար տեխնոլոգիաների կենտրոնն ընդլայնում է իր աշխատանքները
ՍՏԵՓԱՆԱԿԵՐՏ, 13 սեպտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում տեղեկացրել է Ստեփանակերտի Թումո կենտրոնի ղեկավար Կորյուն Խաչատուրյանը և հավելել, որ ընդունելիությունը կատարվում է ողջ տարին:
Սեպտեմբերի մեկից մինչև այսօր Թումո ստեղծարար տեխնոլոգիաների կենտրոն է ընդունվել 118 նոր աշակերտ, որոնց մեծամասնությունը վերոնշյալ բնակավայրերից են: Թումոն այժմ ունի հազարից ավել աշակերտ:
«Ստեփանակերտի Թումո կենտրոնը և ԼՂՀ կառավարությունն աջակցել ու միջոցներ են հատկացրել, որպեսզի քաղաքների և գյուղերի աշակերտները կարողանան գալ և մասնակցել դասընթացներին: 10 երեխա էլ Մարտունիի Հաղորտի գյուղից են ընդունվել, որոնց տրանսպորտի հարցը լուծվել է ամերիկահայ բարերաների կողմից: Միջոցներ ենք ձեռնարկում նաև, որ այլ բնակավայրերի երեխաներն էլ հնարավորություն ունենան ընդգրկվելու Թումոյի դասընթացներին», - մանրամասնել է Կ. Խաչատուրյանը՝ ավելացնելով, որ այս տարի, ի տարբերություն նախորդ տարվա, հենց սեպտեմբերի 5-ից է գործում Թումոյի դասընթացները:
Ստեփանակերտի Թումո կենտրոնի ղեկավարը նաև ասել է, որ կենտրոնում այժմ ընթանում են աշխատարաններ:
«Աշխատարանները խտացված դասընթացներ են, երբ դասերն անցկացնում են արտասահմանից եկած թոփ մասնագետները: Սան Ֆրանցիսկոյից ամերիկահայ Լարա Սարգիսյանը, ով աշխատում է Netflix կազմակերպությունում, 3 շաբաթ աշխատելու է մեզ և երեխաներին սովորեցնելու է ինչպես աշխատել ֆիլմերի ձայնային ձևավորման վրա։ Աշխատարաններ են իրականացնելու նաև անիմացիայի և ռոբոտաշինության մասնագետների կողմից»,- մանրամասնել է Կ. Խաչատուրյանը՝ ընդգծելով, որ նշվածներից բացի լինելու են այլ աշխատարաններ ևս, ինպես նաև այլ հետաքրքիր նախագծեր: