Թուրքիայում աշխատանքից ազատված հազարավոր ուսուցիչներ բողոքի ակցիա են կազմակերպել իշխանությունների դեմ։
Թուրքիայում աշխատանքից ազատված հազարավոր ուսուցիչներ բողոքի ակցիա են կազմակերպել իշխանությունների դեմ
ՍՏԵՓԱՆԱԿԵՐՏ, 18 սեպտեմբերի, ԱՐՑԱԽՊՐԵՍ։ Թուրքիայում հայտնի «Կրթությունը դու ես» հասարակական կազմակերպությունը մեծ բողոքի ակցիա է կազմակերպել Թուրքիայի տասնյակ քաղաքներում: Բողոքի ակցիային մասնակցել են աշխատանքը կորցրած հազարավոր ուսուցիչներ, դպրոցական անձնակազմի անդամներ, ավագ դպրոցների աշակերտներ. գրում է թուրքական ընդդիմադիր Evrensel թերթը:
Մասնակիցները վանկարկել են «Ձեռք չտաս ուսուցչիս» կարգախոսն ու իշխանություններից պահանջել վերանայել աշխատանքից ազատված և 3 տասնյակի հասնող ուսուցիչների վերաբերյալ որոշումը:
Թուրքիայում հուլիսի 15-ի հեղաշրջման փորձից հետո երկրում իրականացվող անվտանգության միջոցառումների շրջանակներում կառավարության հրամանով աշխատանքից ազատվել է շուրջ 28 163 ոսուցիչ: Նրանք մեղադրվում են հուլիսի 15-ի հեղաշրջման փորձի կազմակերպիչ համարվող թուրք կրոնական քարոզիչ Ֆեթուլլահ Գյուլենի խմբավորման անդամ լինելու մեջ: Բացի դրանից` 15 200 ուսուցիչ մեղադրվել է դպրոցներում քրդամետ քարոզչություն տանելու և ահաբեկչական կազմակերպություններին աջակցելու մեջ:
Հիշեցնենք, որ հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, ով ներկայումս բնակվում է ԱՄՆ Փենսիլվանիա նահանգում:
