Դոնալդ Թրամփի՝ ԱՄՆ նախագահ ընտրվելու կապակցությամբ լուրջ մտահոգվելու կարիք չկա, սակայն աշխատելու տեղ միշտ էլ կա:
Թրամփի՝ ԱՄՆ նախագահ ընտրվելու կապակցությամբ լուրջ մտահոգվելու կարիք չկա, սակայն աշխատելու տեղ միշտ էլ կա. Շավարշ Քոչարյան
ՍՏԵՓԱՆԱԿԵՐՏ, 10 նոյեմբերի, ԱՐՑԱԽՊՐԵՍ: Այս մասին այսօր Կառավարությունում լրագրողների հետ զրույցում ասաց ՀՀ փոխարտգործնախարար Շավարշ Քոչարյանը՝ պատասխանելով հարցին, թե արդյոք հայկական կողմը մտահոգություն չունի՞, որ Թրամփի ընտրվելով՝ մեր տարածաշրջանն ԱՄՆ-ի ուշադրության կենտրոնում չի լինի այնպես, ինչպես հիմա է, հայտնում է Թերթ.ամ-ը:
«Աշխարհի տարբեր ծայրերում իրարից այնքան տարբեր գնահատականներ կան, այդ թվում՝ նաև Հայաստանում: Համենայնդեպս, մենք գործ ունենք կայուն համակարգի հետ՝ իր կայուն փորձագիտական դաշտով, իր նախապես ունեցած մոտեցումներով ու ծրագրերով»,-ասաց Շավարշ Քոչարյանը՝ անդրադառնալով Հայաստանում հնչած այն կարծիքներին, թե ԱՄՆ դերակատարությունը կթուլանա:
Շավարշ Քոչարյանն ասաց, որ պետք է սպասել և տեսնել, թե այդ կայուն համակարգով հանդերձ ինչ քաղաքականություն կորդեգրի Սպիտակ տունը. «Ես չեմ կարծում, որ լուրջ մտահոգվելու տեղ կա, սակայն աշխատելու տեղ միշտ էլ կա»:
Հարցին, թե տարիներ առաջ լրագրողի՝ Լեռնային Ղարաբաղի Հանրապետությանը վերաբերող հարցին ի պատասխան Թրամփն ասել էր, որ ինքը տեղյակ չէ այդ խնդրի մասին, արդյոք սա մտահոգի՞չ չէ հայկական կողմի համար, Շավարշ Քոչարյանն ասաց, որ ԱՄՆ կայուն համակարգ ունեցող երկիր է իր ինստիտուցիոնալ հիշողությամբ, փորձագետներով, կառույցներով։
«Այնպես որ դա խնդիր է, պարտադիր չէ, որ աշխարհի ամեն մի մասում տեղի ունեցած իրադարձությունների մասին թեկնածուն ունենա լիակատար պատկերացում, այլ բան է՝ ընտրվելուց հետո: Դրա համար համապատասխան կառույցներ կան»,-ասաց նա։
