Թուրքիայի վարչապետ Բինալի Յըլդըրըմն այսօր պաշտոնական այցով մեկնում է Ռուսաստանի Դաշնության մայրաքաղաք Մոսկվա:
Թուրքիայի վարչապետը մեկնում է Մոսկվա
ՍՏԵՓԱՆԱԿԵՐՏ, դեկտեմբերի 5, ԱՐՑԱԽՊՐԵՍ։ Նախատեսվում է, որ Թուրքիայի վարչապետը Մոսկվայում կհանդիպի իր ռուս գործընկեր Դմիտրի Մեդվեդևի հետ: Նշվում է, որ Յըլդըրըմին կընդունի նաև ՌԴ նախագահ Վլադիմիր Պուտինը, գրում է թուրքական «Միլլիյեթ» պարբերականը:
Պարբերականի փոխանցմամբ՝ հանդիպումների ընթացքում քննարկվելու են մի շարք տարածաշրջանային հարցեր, մասնավորապես՝ Սիրիայում և Իրաքում տիրող իրավիճակը, ռուս-թուրքական ճգնաժամից հետո հարաբերությունների կարգավորմանն ուղղված մի շարք խնդիրներ և զբոսաշրջային ու էներգետիկ ոլորտում ընդլայնված համագործակցությանն առնչվող հարցեր:
Հիշեցնենք, որ Թուրքիայի և ՌԴ-ի հարաբերությունները սրվել էին թուրք-սիրիական սահմանին ռուսական Սու-24 ինքնաթիռի խոցումից հետո: Դրանից հետո Ռուսաստանը պատժամիջոցներ է սահմանել Թուրքիայի նկատմամբ՝ արգելելով այդ երկրից մի շարք սննդամթերքների, թռչնամսի, մրգերի ներմուծումը, ինչպես նաև սահմանափակել է ռուս զբոսաշրջիկների՝ Թուրքիայի հանգստավայրեր այցելելու հնարավորությունը։ Սակայն այս տարվա ամռան սկզբին Թուրքիայի նախագահ Ռեջեփ Թայիփ Էրդողանը ներողություն է խնդրել ռուսական իշխանություններից կատարվածի համար, ինչին հաջորդել են երկու երկրների հարաբերությունների վերականգնման աշխատանքները։
