Քանի դեռ Մերձավոր Արևելքում լարվածությունն անվերահսկելի չէ, ղարաբաղյան հակամարտության մասով լուրջ զարգացումներ կանխատեսելի չեն:
Ադրբեջանի համար տեխնիկապես հիմա ավելի դժվար է գնալ նոր ավանտյուրայի. վերլուծաբան
ՍՏԵՓԱՆԱԿԵՐՏ, 14 ապրիլի, ԱՐՑԱԽՊՐԵՍ: Այսօր կայացած մամուլի ասուլիսի ժամանակ այս մասին ասաց Կովկասի ինստիտուտի փոխտնօրեն Սերգեյ Մինասյանը:
«Ոչ ոքի համար գաղտնիք չէ, որ ապրիլյան լարվածությունից հետո ՀՀ և ԼՂՀ զինված ուժերի ռազմատեխնիկական վերազինման գործընթացն ակտիվացավ: Այժմ Ադրբեջանի համար տեխնիկապես ավելի դժվար է գնալ նոր ավանտյուրայի՝ հաշվի առնելով ռազմական բալանսի փոփոխությունը՝ հօգուտ Հայաստանի: Բացի այդ՝ ապրիլյան պատերազմից հետո հակառակորդը կորցրել է հանկարծակի հարձակվելու հնարավորությունը, ինչպես վարվեց մեկ տարի առաջ:
«Ադրբեջանն այս պահին ուղղակի ի վիճակի չէ նոր պատերազմ սկսել»,- Panorama.am-ի փոխանցմամբ՝ ընդգծեց բանախոսը:
Սերգեյ Մինասյանը չբացառեց, որ ԱՄՆ նախագահ Դոնալդ Թրամփի վարչակազմի՝ Օբամայի վարչակազմից ավելի վճռական լինելը կարող է հանգեցնել ԵԱՀԿ ՄԻնսկի խմբի ամերիկացի համանախագահի առավել վճռականության:
«Բեկումնային գործընթաց, կարծում եմ, այս տարի չի գրանցվի: Հանդիպումներ կլինեն, այդ թվում՝ երկու երկրների նախագահների մակարդակով, բայց առավելագույնը, որին կկարողանա այս տարի հասնել միջազգային հանրությունը, կլինի շփման գծում վստահության մեխանիզմերի ներդրումը»,- ասաց վերլուծաբանը:
Անդրադառնալով Թրամփի կողմից Հայոց ցեղասպանության ճանաչման հնարավորությանը՝ վերլուծաբանը նշեց, որ սա խիստ անկանխատեսելի հարց է՝ հաշվի առնելով ԱՄՆ նախագահի բավական իմպուլսիվ լինելու, հանգամանքը:
