ԱՄՆ Կոնգրեսի Ներկայացուցիչների պալատի ավելի քան 35 անդամներ բաց նամակով դիմել են Պետդեպարտամենտին՝ կոչ անելով հրաժարվել Թուրքիային ատրճանակների վիճահարույց վաճառքից:
ԱՄՆ 35 կոնգրեսականներ Պետդեպին կոչ են արել Թուրքիային չվաճառել ատրճանակներ
ՍՏԵՓԱՆԱԿԵՐՏ, 30 հունիսի, ԱՐՑԱԽՊՐԵՍ: Այս մասին նշվում է ԱՄՆ Հայ դատի հանձնախմբի (ANCA) ֆեյսբուքյան էջում:
ԱՄՆ Կոնգրեսի հայկական հարցերով հանձնախմբի համանախագահներ Դեյվ Թրոթը (հանրապետական) ու Ֆրենք Փալոունը (դեմոկրատ) մի շարք այլ բարձրաստիճան կոնգրեսականների հետ (Ադամ Շիֆ, Էլիոթ Էնգել) կոչ են արել Պետդեպարտամենտին թույլ չտալ, որ ամերիկյան արտադրության կիսավտոմատ ատրճանակները վաճառվեն Թուրքիայի նախագահ Ռեջեփ Թայիփ Էրդողանի անվտանգության ծառայությանը, որի անդամները մայիսի 16-ին Վաշինգտոնում Թուրքիայի դեսպանատան մոտ հարձակվել ու դաժան ծեծի էին ենթարկել խաղաղ ցուցարարներին:
Աղբյուրը մանրամասնում է, որ Թուրքիայի նախագահի անվտանգության ծառայությանը պետք է վաճառվի 1.2 մլն դոլար արժողությամբ 1.600 հատ կիսավտոմատ ատրճանակ:
ANCA-ի գործադիր տնօրեն Արամ Համբարյանն իր երախտագիտությունն է հայտնել երկկուսակցական նախաձեռնության հեղինակներին:
«Հենց այստեղ՝ ամերիկյան հողի վրա, մենք ականատես եղանք նախագահ Էրդողանի ակնհայտ անհարգալից վերաբերմունքին ժողովրդավարության հանդեպ, ինչն արտահայտվեց նրա կամակատարների կողմից խաղաղ ցուցարարների վրա դաժան հարձակմամբ: Միացյալ Նահանգները՝ որպես ամբողջ աշխարհում ազատության և իրավունքների օրինակելի մոդել, չի կարող հանդուրժել ժողովրդավարության սկզբունքների նմանօրինակ ոտնահարումներ: Մինչդեռ առաջարկված զենքի գործարքը կլինի ոչ այլ ինչ, քան Էրդողանի կամակատարների դաժան արարքին աջակցություն: Մենք պետք է ստիպենք Էրդողանին ու իր թակնապահներին պատասխան տալ իրենց արածի համար»,- նշել է կոնգրեսական Թրոթը:
Նշվում է, որ նման պահանջ պարունակող բաց նամակով է հանդես եկել նաև Կոնգրեսի հունական հարցերով հանձնաժողովը:
