ԱՄՆ Կոնգրեսի Հայաստանի հարցերով հանձնախմբի անդամները հայտարարությամբ են հանդես եկել Արցախում ականազերծման աշխատանքներ իրականացնելու ընթացքում ականի պայթյունի միջադեպի կապակցությամբ, ինչի հետևանքով երեք մարդ զոհվել է, երկուսը՝ վիրավորվել:
ԱՄՆ կոնգրեսականները ցավակցություն են հայտնել Արցախում ականի պայթյունից զոհվածների հարազատներին
ՍՏԵՓԱՆԱԿԵՐՏ, մարտի 30, ԱՐՑԱԽՊՐԵՍ: Ինչպես տեղեկացրին Ամերիկայի հայկական համագումարից, ԱՄՆ Կոնգրեսի Հայաստանի հարցերով հանձնախմբի նախագահ Ֆրենկ Փալոնն ընդգծել է, որ չնայած ականների վնասազերծման ժամանակ առկա մշտական վտանգին՝ խորը մտահոգություն է ապրել, երբ լսել է ողբերգական միջադեպի մասին: «Ես ցավակցություն եմ հայտնում զոհված անձանց ընտանիքներին: Արցախը կարող է արագ հաղթահարել տեղի ունեցածի հետևանքները: Ես հույս եմ հայտնում, որ այս իրադարձությունը լույս կսփռի շատ կարևոր աշխատանք իրականացնող կազմակերպությունների վրա, ինչպիսին է Halo trust-ը: Իսկ ականազերծման աշխատանքները պետք է շարունակվեն և պետք է առավելագույնս անվտանգ լինեն»,- ասել է Փալոնը: Կոնգրեսի հայկական հարցերով հանձնախմբի համանախագահ Ջեքի Սփիերը նշել է, որ խորը ցավ է ապրել՝ լսելով ականազերծման աշխատանքներ իրականացնելու ընթացքում ականի պայթյունի հետևանքով զոհերի և վիրավորների մասին: Ցավակցում եմ զոհերի ընտանիքին, ընկերներին և հարազատներին, իմ աղոթքներում են: Արցախի ժողովուրդը շարունակում է կրել պատերազմի կործանարար հետևանքները: Ես խոստանում եմ շարունակել իմ աջակցությունը HALO trust-ին և Արցախին»,- նշել է Սփիերը: Կոնգրեսական Դեյվիդ Վալադաոն էլ ընդգծել է, որ ցավում է ականի պայթյունի հետևանքով զոհված և վիրավորված անձանց համար, ովքեր իրենց կյանքը վտանգի տակ են դրել ուրիշների անվտանգությունն ապահովելու համար: «Նրանց զոհաբերությունը երբեք չի մոռացվի: Այս ողբերգությունը ևս մեկ հիշեցում է տարածաշրջանում առկա վտանգի մասին, և մենք պետք է շարունակենք մեր աշխատանքը, որպեսզի հասնենք նրան, որ մարդիկ այդտեղ ապրել առանց նման պատահարների զոհ դառնալու վախի»,- ասել է Վալադաոն: «HALO Trust» կազմակերպությունը հաստատում է, որ մարտի 29-ի առավոտյան Մարտակերտի շրջանի Ղազանչի տեղանքում հակատանկային ականի պատահական պայթյունի հետևանքով մահացել են կազմակերպության երեք աշխատակիցներ, իսկ երկուսը՝ վիրավորվել։ Նշված ժամանակահատվածում կազմակերպության աշխատակիցները գտնվել են մեքենայում՝ իրականացնելով զննման աշխատանքներ: Վիրավորները տեղափոխվել են հիվանդանոց։ Հակատանկային ականի պատահական պայթյունի հետևանքով վիրավորում ստացած եւ Արցախի Հանրապետության առողջապահության նախարարության Հանրապետական բժշկական կենտրոն տեղափոխված Արամ Մկրտչյանի (ծնվ. 1974 թ.) վիճակը գնահատվում է կայուն ծանր՝ թույլ դրական դինամիկայով: Նրա մոտ առկա էր ներքին արյունահոսություն, փայծաղի պատռվածք. կատարվել էր փայծաղի հեռացում: Ականի պայթյունի հետեւանքով վիրավորված մյուս հիվանդի` Գարիկ Ղահրիյանի (ծնվ. 1987 թ.) վիճակը գնահատվում է ծայրահեղ ծանր, կա թեթև դրական տեղաշարժ, հեմոդինամիկ տվյալները կայուն են: