Հոկտեմբերի 2-ին Դիլիջանում մեկնարկել է եռօրյա դասընթաց՝ նվիրված ռազմադաշտային վիրաբուժությանը, որը կազմակերպել է Կարմիր խաչի միջազգային կոմիտեի (ԿԽՄԿ) պատվիրակությունը Հայաստանում՝ ՀՀ առողջապահության նախարարության և ՀՀ պաշտպանության նախարարության հետ համատեղ։
Հայ բժիշկները մասնակցում են ռազմադաշտային վիրաբուժության դասընթացին
ՍՏԵՓԱՆԱԿԵՐՏ, 3 հոկտեմբերի, ԱՐՑԱԽՊՐԵՍ: ԿԽՄԿ երևանյան գրասենյակի հաղորդմամբ, դասընթացը վարում են ռազմադաշտային վիրաբուժության բազմամյա փորձ ունեցող ԿԽՄԿ-ի վիրաբույժներ պարոն Անդրեաս Վլադիսը և տիկին Օսա Մոլդին։ Սեմինարի նպատակն է փոխանցել ԿԽՄԿ-ի փորձը տեղական մասնագետներին, ովքեր, աշխատելով Ղարաբաղյան հակամարտության տարածքում, պետք է տրամադրեն բուժօգնություն հրազենային վիրավորում ստացած մարդկանց՝ հաճախ տեխնիկական միջոցների սղության պայմաններում։
Դասընթացին մասնակցում են քաղաքացիական և ռազմական ոլորտի 21 վիրաբույժներ Հայաստանից և Լեռնային Ղարաբաղից։ Սեմինարի ընթացքում նրանք ձեռք կբերեն հավելյալ գիտելիքներ բարդ վնասվածքների և հրազենային վերքերի բուժման, վարակների կառավարման և անզգայացման վերաբերյալ։ Մասնակիցները նաև կներկայացնեն և կքննարկեն դեպքեր սեփական պրակտիկայից։
«Վերջին երեսուն տարիների ընթացքում, աշխատելով տարբեր հակամարտային իրավիճակներում, ԿԽՄԿ-ի թիմերը հավաքագրել և վերլուծել են վիրաբուժական գործունեությանը վերաբերող համապարփակ տեղեկատվություն: Մինիմալ միջոցներով բուժօգնություն տրամադրելու մեր մեթոդաբանությունը հիմնված է ավելի քան 100,000 դեպքերի ուսումնասիրության վրա։ Ուրախ ենք, որ այսօր կա հնարավորություն առաջարկելու այս գիտելիքը նաև հայ վիրաբույժներին, որոնք իրենց հերթին կկիսեն սեփական փորձը մեր մասնագետների հետ», - ասել է Հայաստանում ԿԽՄԿ պատվիրակության ղեկավարի տեղակալ պարոն Նիմա Դադբինը։
Ռազմադաշտային վիրաբուժության դասընթացը Հայաստանում անցկացվում է արդեն երկրորդ անգամ։ Անցյալ տարի նմանատիպ եռօրյա սեմինարին մասնակցել էին 80 հայ վիրաբույժներ։
