Այսօր՝ դեկտեմբերի 28-ին, Արցախի Հանրապետության նախագահի նստավայրում տեղի է ունեցել ԱՀ-ում ֆիզկուլտուրայի և սպորտի ասպարեզում լավագույն ցուցանիշների հասած, միջազգային եւ հայրենական հարթակներում փայլուն արդյունքներ արձանագրած մարզիկների ու մարզիչների պարգևատրման հանդիսավոր արարողություն:
Հանրապետության նախագահը պարգևատրել է հայրենական և միջազգային մրցաշարերում մեդալների արժանացած մարզիկներին
ՍՏԵՓԱՆԱԿԵՐՏ, 28 դեկտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ նախագահ Բակո Սահակյանը դրամական բարձր պարգևներ է հանձնել մարզիկներին ու մարզիչներին:
Իր խոսքում ԱՀ նախագահն ասել է, որ անցնող տարին հանրապետության համար եղել է սպորտի բնագավառում լուրջ ձեռքբերումների տարի: «Մեր մարզիկները գրավել են նշանակալի տեղեր հայրենական և միջազգային հարթակներում՝ հաղթելով Հայաստանի, Եվրոպայի և աշխարհի առաջնություններում: Կիոկուշին կարատե դո մարզաձևում Արթուր Առուշանյանը միաժամանակ դարձել է Հայաստանի, Եվրոպայի և աշխարհի առաջնությունների չեմպիոն:
Ունենք 7 Եվրոպայի և 13 ՀՀ չեմպիոններ: Արցախցի 3 մարզիկներ դարձել են աշխարհի, 1-ը՝ Եվրոպայի և 4-ը՝ Հայաստանի արծաթե մեդալակիրներ: 8 մարզիկ դարձել է աշխարհի, 11-ը՝ Եվրոպայի և ևս 8-ը՝ ՀՀ բրոնզե մեդալակիրներ: Մեր բոլոր սպորտային հաջողությունների հիմքում ընկած է այն նպատակաուղղված աշխատանքը, որը տարիներ շարունակ իրականացվում է պետության կողմից:
Դա առաջին հերթին իր մեջ ներառում է անհրաժեշտ նյութատեխնիկական բազայի և մարզիկների ֆիզիկական պատրաստման համար համապատասխան պայմանների ստեղծումը, մարզիկների խրախուսումը, բազմաբնույթ միջոցառումների իրականացումը»,- նշել է Բակո Սահակյանը և ավելացրել, որ գրանցված հաղթանակները մարզիչների տքնաջան աշխատանքի արդյունքն են. մարդկանց, ովքեր օժտված են բարձր մարդկային և ֆիզիկական պատրաստություններով, ունակ են ժամանակին հայտնաբերել տաղանդաշատ երիտասարդներին:
«Այսօր մենք կարող ենք փաստել՝ մեր հանրապետությունն ունի ձեւավորված սպորտային դպրոցներ, որոնք պատրաստ են լուծելու իրենց առջեւ դրված խնդիրները: Փոքր Արցախը, իսկապես, իր արժանի տեղը նվաճեց համաշխարհային սպորտի մեջ, եւ մեր հաղթանակները դրա վառ օրինակներից են: Առողջ, ֆիզիկապես ուժեղ, կիրթ, նպատակասլաց եւ հայրենասեր երիտասարդությունը մեր ժողովրդի հպարտությունն ու պարծանքն է, մեր երկրի եւ պետության հուսալի պաշտպանը, նրա բնականոն զարգացման եւ զորացման ամենամեծ ներուժը»,- ավելացրել է Բակո Սահակյանը:
ԱՀ կրթության, գիտության և սպորտի նախարար Նարինե Աղաբալյանն էլ ասել է, որ տարեցտարի խրախուսման ներկայացվող մարզիկների թիվն աճում է, իսկ մարզաձևերը՝ ավելանում: «Դա լավագույնս հաստատում է, որ ոլորտում իրականացվող պետական քաղաքականությունն արդյունավետ է և տեսանելի: Ակնհայտ է, որ հատկապես վերջին տարիներին մեծ աշխուժություն է առաջացել մարզաշխարհում և սկսվել է մի յուրօրինակ շարժում. 2017 թվականին մարզիչներն ու մարզիկները հայկական երկու պետական դրոշներ են ծածանել 30-ից ավելի երկրներում՝ ներկայանալով որպես լավագույնն աշխարհում ճանաչվածների մեջ»,- նշել է Ն. Աղաբալյանը:
ԱՀ նախագահի բարձր պարգևի արժանացած կիոկուշին կարատե դո մարզաձևի մարզիչ, Սև գոտի առաջին դան, ՊԲ զինծառայող Արմեն Պետրոսյանն իր խոսքում ասել է, որ դեռևս 2007 թվականին ԱՀ նախագահը կոչ էր արել մասսայականացնել մարզաձևը: «ԱՀ ՊԲ-ն ևս նպաստեց կիոկուշինի զարգացմանը՝ ցուցաբերելով նյութական աջակցություն: Այս տարի առաջին անգամ հենց կիոկուշին կարատեի բազայի վրա և Արցախի մարտարվեստների ասոցիացիայի հետ համատեղ կազմակերպել ենք բանակային ձեռնամարտի առաջնություն և, ընտրելով հավաքական թիմ, փայլուն կերպով մասնակցել ՀՀ ԶՈՒ և ԱՊՀ երկրորդ ռազմամարզական խաղերին՝ արժանանալով 3 ոսկե, 1 արծաթե և 2 բրոնզե մեդալների: Լինելով զինծառայող և մարզիչ՝ խոստանում եմ իմ ունեցած գիտելիքներն ու փորձն օգտագործել բանակային ձեռնամարտը զարգացնելու և բանակում այն տարածելու նպատակով»,- նշել է Ա. Պետրոսյանը:
Իսկ կիոկուշին կարատե դո մարզաձևի աշխարհի և Եվրոպայի առաջնություններում, ինչպես նաև ՀՀ առաջնությունում առաջին տեղեր գրաված Սև գոտի երկրորդ դան Արթուր Առուշանյանն իր խոսքում ասել է, որ 2017 թվականը նշանավորվել է մեծ ձեռբերումներով, և դրա պսակն է աշխարհի չեմպիոնի տիտղոսի պաշտպանումը:
Միջոցառմանը ներկա էին ԱՀ պետական նախարար Արայիկ Հարությունյանը, ԱԺ նախագահ Աշոտ Ղուլյանը, պաշտոնատար անձինք, հյուրեր և այլք: