Բուլղարիայի ազգային գրադարանում է գտնվում Օսմանյան արխիվների աշխարհի ամենահարուստ հավաքածուներից մեկը:
Թուրքիան Հայկական հարցին վերաբերող Օսմանյան փաստաթղթերի մի մեծ հավաքածու 1931թ.-ին վաճառել է Բուլղարիային
ՍՏԵՓԱՆԱԿԵՐՏ, 18 հունվարի, ԱՐՑԱԽՊՐԵՍ: Այս մասին գրում է Կանադայի հայկական պարբերականներից «Հորիզոնը»՝ հղում անելով «ԹուրքՓրես» արաբալեզու կայքէջին:
Tert.am-ի փոխանցմամբ՝ աղբյուրը նշում է, որ հենց Բուլղարիայում է գտնվում մոտ 500 000 օսմանյան արխիվային միավոր և մոտ մեկ մլն փաստաթուղթ, որոնց թվում են Հայկական հարցին վերաբերող մի շարք կարևոր արձանագրություններ:
Բանն այն է, որ 1877-1878 թվականների ռուս-թուրքական պատերազմից հետո օսմանյան ուժերը Բուլղարիայից ետ քաշվեցին և այնտեղ թողեցին իրենց արխիվների մի մասը:
Բացի այդ՝ վերոնշյալ փաստաթղթերի մի մասը Բուլղարիայի կառավարությունը ձեռք է բերել 1931 թվականին իրականացված աճւորդի ժամանակ, երբ թուրքական իշխանությունները վերամշակման համար բավականին մեծ թվով թղթեր էր վաճառքի հանել:
Այն ժամանակվա Թուրքիայի վարչապետ Իսմեթ Ինոնյուն այդպես էլ չբացահայտեց, որ վերամշակման նպատակով վաճառքի հանված այդ թղթերն իրականում օսմանյան փաստաթղթեր էին: Այս ամենը մաս էր կազմում մի շարք կարևոր արխիվային փաստաթղթերից ազատվելու ծրագրի, որը նպատակ ուներ ոչնչացնելու օսմանյան անցյալին վերաբերող մի շարք փաստեր:
Նշվում է, որ այդ ժամանակ Բուլղարիային վաճառվեց մոտ 50 տոննա օսմանյան փաստաթուղթ, որոնց մեկ կգ-ի գինը սահմանված էր 3 մանրադրամ:
